Arbesko egoitzaren lanak esleitu dituzte dagoeneko
Lanak Urbycolan SL, Construcciones Zubieder SL eta Construcciones Mariezcurrena SL aldi baterako enpresa elkarteari esleitu dizkio Udalak Arbesko egoitzaren lanak. 2027an amaitzea aurreikusten dute.
Arbesko egoitza berriaren urbanizazio lanak Lanak Urbycolan SL, Construcciones Zubieder SL eta Construcciones Mariezcurrena SL aldi baterako enpresa elkarteari esleitu dizkio Irungo Udalak, 2.122.684,90 euroan.
Bi fase izango dituzte lanek. Lehen sei hilabeteetan sastrakak kendu, lursaila garbitu, gainazala saneatu, material granularrak erabiliz aurrekarga gauzatu, harri lubera eraiki, asentu lerroak instalatu eta lurrak egonkortzeko geruzak osatuko dira.
Bigarren fasean bidearen urbanizazio lan nagusiak egingo dira, Gipuzkoako Foru Aldundiak sustatutako Arbesko Gizarte Zerbitzuen Zentroaren proiektuarekin koordinaturik. Zazpi hilabeteko iraupena izango du.
Lanak uda ondoren hasi eta bi urte irautea aurreikusten du Udalak, hau da, 2027 arte.
Lanak bukatzerakoan adinekoentzako 130 toki izango ditu Arbesko egoitzak, zazpi bizikidetza unitatetan banatuta. Desgaitasuna dutenentzako beste bi unitate egongo dira, guztira 26 toki. Eguneko zentroak ere izango ditu egoitza berriak: 30 tokiko bat adinekoentzat, eta 25 tokiko bat desgaitasuna dutenentzat. Gainera, mendekotasunik ez duten 50 adinekorentzat tutoretzapeko 48 apartamentu sortuko dituzte.
Pozik agertu da Cristina Laborda, Irungo alkatea: “Lan hauen bidez, partzela forma hartzen hasiko da, eta beharrezko urratsak egingo ditugu egoitza berriaren bidean. Behar sozial garrantzitsu bati erantzuteaz gainera, egitura guztiz integratuta egongo da Arbes auzoan. Proiektu honek zainketak eskainiko ditu baina, gainera, irundar askoren bizitza hobetuko du eta erabilera sozial berri bat emango dio hiriaren eremu honi”.
