Asteburu gazi-gozoa Hondarribia Arraun Elkartearentzat
Hondarribia Ak asteburu borobila egin du bosgarren eta hirugarren sailkatuz. Emakumeek erakustaldia eman zuten Donostian, baina azkenak geratu ziren Zierbenan. Hondarribia B, aldiz, 10. izan zen Plentzian.
Hondarribia larunbatean ziabogan.Aitor Arrizabalaga/TKE Asteburu honetan jokatu dira Euskotren eta Eusko Label Ligetako hirugarren eta laugarren jardunaldiak. Larunbatean Kontxako badian aritu ziren arraunlariak, igandean, berriz, Zierbenan.
Euskotren Ligan dabilen Hondarribiak erakustaldia eman zuen larunbatean. Astillero eta Donostiarra atzean utzi eta ziabogara Hibaikaren aurretik 8 segundoko abantailarekin iritsi ziren berdeak. Itzuleran olatu guztiak hartu eta sentsazio bikainekin bukatu zuten estropada. Lehenengo txanda aise irabazi eta ohorezko txandako Zumaiaren aurretik amaitzea lortu zuten. Bandera Tolosaldearen esku geratu zen, Oriorekin lehia estua izan ondoren.
Igandean, ordea, zortea ez zuten aldeko izan. Zierbenan alde handia izaten da kale batetik bestera, eta normalean inork ez ditu hirugarren eta laugarren kaleak nahi izaten. Hondarribiarrei kale zozketan hirugarren kalea egokitu zitzaien eta ohorezko txandan Tolosaldeatik 3 segundotara soilik geratu baziren ere, sailkapen orokorrean azkenak izan ziren. Hibaikaren, Zumaiaren eta Hondarribiarren artean 34 zentesima besterik ez ziren egon. Estropada Arraun Lagunak-ek irabazi zuen.
Iragan astean bezala, sailkapen orokorrean azken postuan jarraitzen dute berdeek, Donostiarrarekin 9 puntutara berdinduta. Ikus emaitzak.
Eusko Label Liga
Hondarribia A ontziak asteburu borobila egin du. Larunbatean, Donostian, bosgarren postuan amaitu zuten jardunaldia. Bigarren txandan aritu ziren eta hasieratik aise menderatu zituzten Getaria, Ares eta Ondarroa. Lehen ziabogan jada sei segundoko aldea ateratzen zieten galiziarrei, eta gutxinaka tartea zabaltzen joan ziren. Estropadako garailea Donostiarra izan zen.
Hurrengo egunean, Zierbenan, bigarren kalea egokitu zitzaien eta horri zukua ateratzea lortu zuten. Lehen eta bigarren luzeetan estu joan zen lehia, baina hirugarrenean tartea zabaltzea lortu eta inertzia berean amaitu zuten estropada. Sailkapen orokorrean hirugarrenak izan ziren, Orio eta Zierbenaren atzetik.
Sailkapen orokorrean 33 punturekin bosgarren postuan dira, baina laugarren postua (Donostiarra) lau puntura besterik ez dute. Ikus emaitzak.
KAE1 Liga
Estropada bakarra izan dute KAE1 Ligako ontziek asteburuan. Plentzian aritu ziren larunbatean eta Hondarribia Bk 10. bukatu zuen ligako seigarren jardunaldia.
Lehen txandan azkenak egin bazuen ere, bigarren txandan aritutako San Pedrok eta Astillerok baino denbora hobea egitea lortu zuten.
Sailkapen orokorrean 12. jarraitzen dute, baina Castreña eta Camargo gertu dituzte oraindik. Ikus emaitzak.
