Hondarribian izandako eraso matxista salatu du udalak
Eraso matxisten kontrako udal protokoloa aktibatu, eta bihar (larunbata) izango den gaitzespen elkarretaratzera dei egin du udalak.
Bihar (hilak 12, larunbata) elkarretaratzera deitu dute Martxoak 8 plazan, 11:30ean. Hondarribiko Udalak jakinarazi du azken egunetan indarkeria matxista kasu bat izan dela udalerrian. Eraso matxisten kontrako udal protokoloa aktibatu du udalak, eta horrela, jasotako informazioa egiaztatu eta biktimari arreta egokia eman ondoren, erakunde adierazpena egin du udalak emakumeak jasandako erasoa salatzeko. “Alde batetik, udalaren jarrera irmoa adierazi nahi dugu, argi eta garbi esateko ez ditugula inola ere onartzen emakumeen eskubideak urratzen dituzten eraso makur hauek; eta, bestetik, herritar guztiei bide bat eskaini diegu gaitzespen argi bat agertu dezaten emakumeen aurkako indarkeriaren aurka”. Bide hori bihar egikarituko da: 11:30ean elkarretaratzera deitu dituzte herritarrak Martxoak 8 plazan herriko emakumeen elkarteek, mugimendu feministak eta udalak. Erasoa jasan duen emakumeari babes osoa adierazi dio udalak, eta haren eskura jarri ditu behar dituen laguntzarako tresnak.
“Indarkeria matxistak arazo sakon bat dauka jatorrian: emakumeak kontrolpean eta mendean izan nahi dituen ideologia. Beraz, indarkeria hori ez da ekintza bakartuen edota azalpenik gabeko gertakarien emaitza”, azaldu du udalak adierazpenean: “Generoen gaineko aurreiritziak, gizartean aski errotuta dauden horiek dira, hain zuzen, halako ondorio larri eta tamalgarrien sortzaile. Emakumeak desberdintasun eta menpekotasun materialeko egoera batera, bizitza prekario batera behartzen ditu gizartearen antolamenduak. Ez ditu herritar osotzat hartzen, gizonezkoen maila berean, eta ez die aukerarik ematen oinarrizko eskubideen jabe izateko”.
Adierazpenaren testuan jasota dago udalak ardura soa duela udalerrian bizi diren pertsona guztiek eskubide guztien jabe izatea bermatzea. “Beraz, ez dugu atsedenik hartuko ahalegin honetan. Gure bizikidetza demokratikoaren oinarriak auzitan jartzen dituen arazo sozial larri honen irtenbidea bilatu beharra baitago guztion artean. Langintza horren barruan, ezinbestekoa da adierazpide egokiak eskaintzea Hondarribiko herritarrei, oro har, emakumeen aurkako eraso guztiak irmotasunez gaitzetsi ditzaten”.
