Uda Jolas eta Udabentura, martxan
Uda jolasen 263 haurrek eta Udabenturan 141 gaztek parte hartuko dute. Edozein zalantza argitzeko Gazteen zerbitzua martxan izango da uztailean zehar.
Uda Jolas eta Udabentura udalekuak martxan diren honetan Hondarribiko Udalak “pozik” adierazi du aurten izena eman duten guztiek izan dutela udalekuetan parte hartzeko aukera. Hori bermatzeko “lan tekniko zehatza” eta “koordinazio handia” eskatu duela adierazi dute.
Uda Jolasen 263 haurrek eta Udabenturan 141 gaztek parte hartuko dute. Uda Jolasen 5 eta 11 urteko haurrek eman dute izena, eta hilaren 1etik 30era hainbat ekintza burutuko dituzte. Aurten, gainera, Izan Arrantzale jarduera estreinatuko dute.
Uda abentura programan, berriz, 12 eta 14 urteko gazteek parte hartuko dute, eta horiek bi txandatan banatu dituzte. Lehena hilaren 2tik 15era izango da eta bigarrena 16tik 30era.
Udalak gogorarazi duenez edozein zalantza argitzeko Gazteen zerbitzua martxan izango da uztailean zehar. Arretarako telefonoa 688 72 80 57 da, eta bulegoak (Jabier Ugarte 6) 10:00etatik 13:00ak arte izango dira zabalik.
Azkenik, hurrengo urteari begira udalekuak antolatzeko esleipen publiko berria aterako dela gogorarazi dute.
