Euskadiko Txapelketa Absolutuan 10 domina eskuratu dituzte BATeko atletek
Goizane Garcia izan da asteburuko atleta nabarmenena. Jaurtiketen modalitatean hiru domina eskuratu ditu. Asteburu honetan 18 eta 23 urte azpiko Espainiako Txapelketak jokatuko dira.
Ekainak 28 eta 29an aire zabaleko Euskadiko Txapelketa Absolutua jokatu da Bilbon. Erkidegoko hitzordu indibidual garrantzitsuena da honakoa eta Bidasoa Atletiko Taldeko atletek errendimendu bikaina izan dute bertan. Guztira 10 dominekin itzuli dira etxera, emakume zein gizonetan.
Emakumeei dagokienez, Goizane Garcia izan zen asteburuko atleta nabarmenena. Hiru domina lortu zituen: urrea mailuan (48,25 m), zilarra pisu jaurtiketan (12,43 m) eta brontzea disko jaurtiketan (40,09 m).
Gainontzean, Zuriñe Celis Euskadiko txapeldun izendatu zuten luzera jauzian, 5,71 m-ko jauzia egin ondoren. Laia Olaskoagaren errendimendua ere “bikaina” izan zen eta Euskadiko txapelduna izan zen 200 metroetan (24,83 m). Azkenik, Alaine Aguerraldek brontzea eskuratu zuen 400 metro hesietan. (1:02,17 min).
Gizonei dagokienez, Euskadiko txapeldunak izan ziren Mikel Aramendi 3.000 metro oztopoetan (9:34,05 min) eta Ander Anglada 800 metroetan (1:52,42 min). Ander Aramendik eta Asier Fernandezek aldiz, zilarrezko dominak zintzilikatu zituzten, 1.500 metroetan (3:51,84 min) Aramendik eta 5.000 metroetan Fernandezek (15:07,41 min).
Espainiako Txapelketak
Asteburu honetan 18 eta 23 urte azpiko Espainiako Txapelketak jokatuko dira. Lehena Castellonen izango da, eta bigarrena Badajozen.
RFEAk (Espainiako Federazioak) eskatutako denbora minimoak lortu ondoren, BATeko hurrengo ordezkariek parte hartuko dute 18 urte azpiko txapelketan: Lukas Cabezon (2.000 m), Mikel Garrancho (400 m), Naia Llorente (altuera jauzia), Eñaut Arburua (400 m hesiak), Rafael Torralba (5 m ibilketa), Alai Cabello (800 m), Jon Gajate (110 m), Julen Mendoza (2.000 m oztopoetan), eta Hai Duong (400 m).
23 urte azpikoan, berriz, hurrengo atletak lehiatuko dira: Victoria Briso (proba konbinatuak), Bruno Cagigos (disko jaurtiketa), Lucia Valero (1.500 m), Marta Blanco (proba konbinatuak), Aitor Fernandez (proba konbinatuak), Mario Estanga (pertika), Manuel Rodriguez (110 m hesiak), Erik Fernandez (200 m), Laia Olaskoaga (200 m), Alejandro Per (200 m) eta Alex Garcia-Gasco (100 m eta 200 m).
