Beherapenei begirako gomendioak eman ditu ACUBIk
Udako beherapenetako erosketak "egoki" egiteko gomendioak dira emandakoak. Kontsumitzaileen Bidasoko elkarteak eskaini ditu.
Udako beherapenen aurrean, ACUBIk hainbat gomendio eman ditu beherapenak “egoki” probestu ahal izateko helburuarekin. Horretarako, gehienezko aurrekontua finkatzea gomendatu dute eta hori lortu ahal izateko behar edo nahi diren produktuak aurretiaz ongi pentsatzea komeni dela azaldu dute.
Gogoratu dute beherapenek prezioan eragin behar dutela eta ez kalitatean. Beherapenetan egongo diren produktu guztiak aurretik salgai egon behar dute dendan bertan eta ezin dira egon narriadurarekin.
Beherapenaren prezioaz gain, aurretik zeukan prezioa agertu behar da etiketan edota zenbateko beherapena izan den ehunekotan adierazi behar da etiketan. Horrez gain, produktua egungoa dela konprobatu behar du erosleak eta ez zaharra. Gutxienez hilabete bat lehenago egon behar izan du salgai.
Esku dirutan beharrean txartelarekin ordainduko dutenek, erosteko muga jartzeko gomendioa eman du ACUBIk. Izan ere, txartelarekin ordaintzean egiten den gastuaren gaineko kontzientzia ez dela hain handia ohartarazi dute. Hainbat establezimenduk txartelarekin ordaintzea bazter dezakete baina hala bada, argi eta garbi erakutsi behar dutela esan du ACUBIk.
Bermearen Legeari erreparatuta, beherapenetako produktuek bi urteko bermea daukate eta bigarren eskukoa baldin badira, urte batekoa. Berme hau idatzita jaso behar du erosleak.
Erosten den produktu bakoitzaren tiketak eta egiaztagiriak gordetzeko gomendioa egin du ere ACUBIk, erreklamazioren bat egitekotan baliagarriak direla azaldu dute. Beherapenetan edota denboraldi arruntean dendaria derrigortuta dago produktua itzultzera produktuak akatsen bat baldin badu edota produktuaren publizitateak itzulketa egin daitekeela adierazten badu. Online erosketetan ez duela zertan hala izan behar adierazi dute eta egoera horietan erosi aurretik itzulketa egiteko aukera dagoen galdetu behar da.
Salgai-hondarrak balioa galdu duten produktuak dira, hondatu direlako edota zaharkituta geratu direlako. Produktu horietan salgai hondarrak direla jarri behar du eta dendarien eskuetan egon behar izana dute beherapenak hasi baino sei hilabete lehenago. Berdina geratzen da likidatu nahi dituzten produktuekin.
