Bidalan programaren edizio berria jarri dute martxan
"Kolektibo zaurgarrienen lan aukerak hobetzea" da Bidalan programaren helburua. Zazpi aukera daude 2025-26 ikasturtean.
Irungo eta Hondarribiko Udalek Bidasoa aktibaren bidez Bidalan programaren edizio berria jarri dute martxan; lankidetza batean oinarritzen da ekimena, eta Gipuzkoako Foru Aldundiaren Elkar-Ekin Lanean estrategiaren barruan dago kokatuta. Programaren helburua “kolektibo zaurgarrienen lan aukerak hobetzea” da formazio ibilbideak eta laguntza pertsonalizatua garatuz; Irungo La Salle, Mendibil Pedagogia Elkartea, Ijitoen Idazkaritza Fundazioa, Emaus Fundazio Soziala, Bidasoa LHII eta Katea Legaia dira lankidetza sarea osatzen dutenen elkarte eta erakunde batzuk.
Nuria Alzaga, Bidasoa aktibako presidentea. “Bidasoa eskualdeak erronka handia du enpleguaren alorrean, batez ere pertsona zaurgarrienekin. Bidasoa aktibatik urteak daramatzagu laguntza, formazioa eta Bidalan bezalako programen bidez enplegura sartzeko zailtasun handienak dituzten pertsonei laguntzen”.
Estitxu Urtizberea Bidasoa aktibako presidenteordeak ere egin du hitzartzea. “Bidalan programak sartzeko zailtasun bereziak dituzten profilei egiten die arreta: kalifikaziorik gabeko gazteei, 45 urtetik gorakoei, luzaroan langabezian daudenei edota laguntza ekonomikoak jasotzen dituztenei”.
Programa zenbait laneratze ibilbidetan egituratzen da, sektore ekonomiko ezberdinetan atzemandako lan beharrei erantzuteko baitago diseinatuta. Azaldu dutenez, aurreko edizioek baino iraupen luzeagoa izango dute oraingoan, eta helburua da kalifikazio profesional bat eskuratzea eta lan merkatuan sartzea erraztea. Modu horretan, ibilbide guztiek barne hartzen dituzte formazio kualifikatzailea, lanik gabeko praktikak eta parte hartzaileei zuzendutako laguntza espezializatua programen fase ezberdinetan aurrera egiteko.
2025 eta 2026 urteetako ibilbideak
- Joskintza. Mendibil Pedagogia Elkartea: 500 orduko formazioa + 80 orduko praktikak.
- Merkataritza laguntzailea. Emaus Fundazio Soziala: 290 ordu + 40 orduko praktikak
- Supermerkatu polibalentea. Irungo La Salle: 322 ordu + 100 orduko praktikak.
- Industry Aukera. Katea Legaia eta Bidasoa LHII: 495 ordu + 80 orduko praktikak.
- Lorde Bidasoa I eta II. Ijitoen Idazkaritza Fundazioa: 160 ordu + 80 orduko praktikak
- Sukaldaritza. Bidasoa aktiba: 730 orduko formazioa.
