EAJ: "Ez gatoz bat San Marko parkean egiten ari diren obrarekin"
San Marko parkeko obrak dekretu bidez onartu dituztela deitoratu eta gardentasun falta egotzi diote udal gobernuari.
Aste honetan hasi dituzte San Marko parkea berroneratzeko lanak, eta hasiera batean esku hartze txiki bat izan behar zena uste baino “inbaditzaileagoa” izaten ari dela iritzita, horiekiko desadostasuna erakutsi nahi izan du Hondarribiko EAJk. Ohar baten bidez Abotsanitzen jarduteko modua salatu eta gertatutakoaren kronologia egin dute.
2021ean, parkearen etorkizuna erabakitzeke zegoenean, Abotsanitzek prozesu parte hartzaile bat egiteko eskatu zuela gogoratu dute lehenik, “bizilagunen iritzia jasotzeaz gain, biologian, ornitologian, hirigintzan, paisajismoan… adituak direnen iritzia jasotzeko”.
Bigarrenik, duela hilabete batzuk, egin zitezkeen esku hartzeak baloratu ahal izateko jeltzaleek “azterketa serio” bat egiteko eskatu zutela azaldu dute, baina udal gobernuak ezezkoa eman eta gutxieneko esku hartze bat egingo zela iragarri zietela, “obra txikietarako kontratu baten bidez gauzatua, udalaren baliabide propioekin”.
Azkenik, apirileko osoko bilkuran, esku hartze horren berri emateko batzorde bat deitu zuen udal gobernuak, baina bilkura horren aurretik dekretua sinatuta zegoela salatu dute.
Obraren dimentsioa
San Marko parkeko lanak hasi dituzte jada, eta hasieran adierazitakoa baino “inbaditzaileagoa” izaten ari da EAJren ustez. “Esku-hartze txiki baten premisapean, makinak sartu dira… eta urmaelak suntsitu dituzte, San Marko parkeko elementu bereizgarrienetako bat”.
Obrak hartu duen dimentsioa ikusita bilera irekia deitu du udal gobernuak, herritarrei burutuko diren lanen berri emateko. Jeltzaleen ustez bilera hori lanak hasi aurretik egin behar zen.
