Zientzia tabernetan sartuko da
Pint Of Science egitasmoa Irunera iritsiko da eta Altzola tabernan medikuntza nuklearrari eta nanoteknologiari buruz arituko dira. Hilaren 21an izango da saioa.
Pint Of Science ekimenarekin zientzia tabernetara gerturatuko dute hainbat dibulgazio hitzaldi, bakarrizketa edo esperimentuekin. Gipuzkoako 8 ostatuetara iritsiko da eta hemezortzi hitzaldi programatu dituzte; Oarso Bidasoara gerturatuta, Errenteria-Oreretako Kantina Lekuonan izango dira hilaren 20an eta Irunera, berriz, hilaren 21ean iritsiko dira Altzola tabernara. Ez da ordaindu behar parte hartzeko.
Errenteriako hitzaldian zelula nomadak eta sekretu kuantikoak izango dituzte hizpide Peio Azkoaga Azkoaga eta Gabriel Molina Terriza adituek. Bi ordu iraungo ditu hitzaldiak, 19:00etatik 21:00etara.
Aldiz, Irunen medikuntza nuklearrari eta nanoteknologiari buruz arituko dira, ikusten denaz eta ezinezkoaz. Kasu honetan ere 19:00etan hasiko da eta 21:00etan bukatu. Laura Navarro Cozcolluela eta Paula Isla Gangoiti arduratuko dira soslaiaz.
Pint of Science Donostia da Gipuzkoan egitasmoa bultzatzen ari dena eta zientzia hitzaldien irisgarritasunaren aldeko apustua da honako proposamena. “Zientzia dibulgazioak zientzia eta teknologiarekiko interesa areagotzen du, eta hori erakusten du FECYT eta LaCaixa Fundazioak egindako ikerketa batek”, azaldu dute. Arrazoi horiengatik, lau hizkuntzatan eskainiko dituzte saioak: euskaraz, gaztelaniaz, ingelesez eta zeinu hizkuntzatan.
Hizkuntzarekin jarraituz, hizkuntza “ulergarria” erabiliko dute eta ziur dira tabernetan “giro berezia” sortuko dela. Parte hartzaileek galderak egiteko aukera izango dute eta zientzia konplexua modu errazean ikasiko dute. Espainia mailako ekimena da eta 600 boluntariotik gora arituko dira lanean; Donostiaren kasuan 13 izango dira boluntario lanetan arituko direnak.
Babesle asko ditu egitasmoak: Biogipuzkoa; CFM; CIC biomagune; DIPC; Fomento San Sebastian; CIC nanogune; Polymat; 3DforScience; Labbox; Technoform; CESIF; VHIO; Miltenyi; Plan Complementario; JJNN; Vadillo Asesores eta beste hainbat erakunde.
Programazio osoa, lotura honetan.
