Museoen Egunak aztarna utziko du Oiasso Museoan
Hilaren 16tik 18ra hainbat bisita antolatu ditu museoak. Horrez gain, igandean doakoa izango da museorako sarrera.
Museoen Nazioarteko Eguna da datorren igandea (hilak 18) eta Oiasso Museoak bat egin nahian, programazio bat prestatu dute hilaren 16tik 18ra luzatuko dena. Aurtengo leloa Museoen etorkizuna etengabe aldatzen ari diren komunitateetan da eta nabarmendu nahi izan dute museoek “ezinbesteko lotura lana” egiten dutela komunitate baten eta haren historiaren eta nortasunaren artean. Aldi berean, aztertu nahi dute nola egin dezaketen museoek “gazteen indarra erakartzeko” eta “teknologia berriei egokitzeko”.
Hilak 16, ostirala
Neandertalak. Beste gizadiaren historia Pirinio Mendebaldean aldi baterako erakusketaren aurkezpena egingo du Joseba Rios Garaizar, Bizkaiko Foru Aldundiko arkeologoak eta erakusketaren komisarioetako batek. Saioa 19:00etan izango da eta parte hartzeko aldez aurretik izena eman behar da 943 63 93 53 zenbakira deituta edo helbide honetara idatzita. Sarrera doakoa da.
Neandertalak dira erakusketako protagonistak eta haien biologia eta bizimodua, garapena eta desagertzeko arrazoiak landu dituzte. Horretarako, 100 pieza arkeologiko baino gehiago bildu dira, gure lurraldeko museo eta gordailuetatik ekarriak. Erakusketa hau Bilboko Arkeologia Museoak sortu zuen, eta abuztuaren 31ra arte egongo da Oiasso Museoan ikusgai.
Horrekin lotuta, Irungo museoak neandertalei buruzko hitzaldi ziklo bat eskainiko du ekainean eta ziklo horretan gaian adituak diren arkeologoak egongo dira.
Hilak 17, larunbata
Museoak esperientzia berri bat eskaintzeko asmoarekin, errealitate birtualeko betaurrekoen bidez termetan murgilduko dira. Museoko bilduma iraunkorra ezagutzeko aukera eskaintzeaz gain, bisitariek esperientzia ezin bereziago bat bizi ahalko dute: errealitate birtualeko betaurreko batzuen bidez Oiassoko termek zer itxura zuten ikusi ahalko dute, areto eta igerilekuetan barrena ibili eta duela 2.000 urte nolakoak ziren irudikatu. Museoak arkeologia bisitariari hurbildu nahi dio modu didaktiko eta zirraragarri batean, berrikuntza teknologikoak baliatuta.
Bisiten plaza kopurua mugatua da eta bi txanda egongo dira: 10:00etan eta 12:00etan gaztelaniaz; eta 11:00etan eta 13:00etan euskaraz. Prezioa 5,75 euro da helduentzat eta 4 euro 6 eta 14 urte arteko gazteentzat. Bisitetan parte hartzeko aldez aurretik izena eman beharra dago, 943 63 93 53 zenbakira deituta edo helbide elektronikora idatzita.
Hilak 18, igandea
Museoaren eguna da igandea eta Oiassoko ataka zabalik egongo da doan. Termak eta museoa bera ikusteko aukera egongo da. Horerz gain, Ama Xantalen ermita bisitatzeko tourra norbere kabuz egin daitekeela oroitu dute, Tour Irun Romano doako mugikorreko aplikazioarekin. Hari esker, Oiassori buruzko aurkikuntza arkeologiko nagusiak bisitatzeko ibilbide bat egingo dute hiriaren erdigunean.
Prezioa 5,75 eurokoa da helduentzat, eta 4 euro 6 eta 14 urte arteko gazteentzat. Bi txanda eskainiko dituzte: gaztelaniaz, 11:00etan; eta euskaraz 12:30ean. Bisitetan parte hartzeko aldez aurretik izena emateko 943 63 93 53 zenbakira deitu behar da edo info-oiassomuseo@irun.org helbidera idatzi.
