Areagotu egingo dira zaintza kamerak eta poliziaren plantilla
Sindikatuekin negoziatuta prozesu baten bidez kontratatuko dituzte udaltzain gehiago. Poliziarentzako baliabideetan ere inbertsio ekonomikoa egingo du udalak.
Herenegun bildu zen Segurtasuna eta Bizikidetzarako Batzorde Iraunkorra eta bertan segurtasunari buruzko datu eguneratuak emateaz eta jarduera planak aurkezteaz gain, udal gobernuak hartutako erabakien berri eman zuten. Hiriko gorroto delituen bilakaeraren polizia informazioa ere partekatu zuten.
Udaltzaingoaren plantilla finkoa handituko dute eta bide publikoan kamera berri gehiago jarri. Agenteen kopurua “modu esanguratsuan eta progresiboan” handituko dute eta sindikatuekin negoziatutako prozesu bat baliatuko dute horretarako. Udalak nabarmendu du beharrezkoa dela espazio publikoan polizia gehiago egotea “funtsezko elementua” delako udalerriaren beharrei erantzun “eraginkorragoa bermatzeko” eta “delituen aurrean prebentzio eta disuasio funtzioa betetzeko”.
Aldi baterako zortzi polizia ere kontratatuko dituzte eta polizia laguntzaile lanetan arituko dira. Etengabe arituko dira polizia operatiboan eta funtzio espezifikoak egingo dituzte, hala nola, udal ordenantzen betetzea kontrolatzea eta zirkulazioa erregulatzea. Langile hauei esker “estaldura eta eraginkortasuna handiagoa” izango dela uste dute.
Ekipamenduan ere inbertsioa egingo du udalak eta polizia ibilgailu berriak erosiko dituzte. Halaber, balen aurkako txalekoak, babes ekipoak, pantailak eta Europako datu baseetara konektatutako hatz marken sistema berritzaile bat erosiko dituzte. Azken baliabide hau atxilotutako pertsonak identifikatzea erraztuko duela azaldu du udalak.
Horrez gain, hiriko hainbat puntutan argiteria hobetuko dute: Dunboan, Behobian, Larreaundin, Katean eta Parte Zaharrean. Pasa den hilabetean iragarri zuen udalak ere hiriko gaueko aisialdirako kontrol plana ondu dutela Ertzaintzak eta Udaltzaingoak eta hori ere azken erabakien parte da.
Kamera gehiago
Segurtasun kamera gehiago jarriko dituzte Irungo hainbat tokitan. Hain zuzen, oinezkoen joan etorri handieneko eremuetan eta gaueko aisialdiko establezimenduak biltzen diren guneetako kanpoaldeetan. “Pertsonen segurtasuna, lasaitasuna eta bizikidetza errazteko neurri bat da”, adierazi dute.
Irunbusen lau linea berrietan kamerak jarriko dituzte barruan, erabiltzaileen segurtasuna bermatzeko helburuarekin. Gidariarentzako izuaren botoi bat ere instalatuko dute.
Cristina Laborda alkateak eskerrak eman zizkien batzordearekin bat egiteagatik merkataritzako eta ostalaritzako Bidashop eta Denok Bat elkarteei. “Martxan jartzen jarraitzen ditugun neurriak aspalditik udal arloen artean zeharka egiten ari garen lanaren emaitza dira”, azaldu du alkateak.
Iñigo Berges Hiritarren Segurtasun eta Bizikidetzarako ordezkariak herritar guztiekin lan egitearen beharra nabarmendu zuen. “Horretan ari gara eta horretan jarraituko dugu”. Udalak hartutako erabakien gainean zehaztu zuen Udaltzaingaoren aginte organigrama berregituratuko dutela Euskal Poliziaren Legera egokitzeko. Atestatuen unitate espezifiko bat ere jarriko dute. “Hilabeteak daramatzagu Udaltzaingoaren eta bere alde sozialaren barruan lanean, eta urte osoan jarraituko dugu hiriko egoera hobetzeko aurrerapausoak egiten, betiere Ertzaintzarekin elkarlan estuan”.
