Herri bazkarirako sarrerak igande honetan erreserba daitezke
Ekainaren 21ean izango da herri bazkaria eta sistema berria sortu dute bazkariko tiketak eskuratzeko.
Sanmartzialetako herri bazkaria ekainaren 21ean egingo da Ficoban eta aurten ere hura antolatzeko elkarlanean aritu dira Betti Gotti, Antxeta irratia eta Irungo Udaleko Kultura departamentua. Bazkariaren eguneko egitaraua ez dute oraindik iragarri, baina gaur jakinarazi dute igande honetan (hilak 11) 12:00etan bazkarirako tiketen erreserbak ahalko direla egin online plataforma baten bidez.
Aurten ere bi pabiloi egongo dira: 18 eta 22 urte artekoentzat eta 23 urtetik gorakoentzat. Helduenentzako pabiloian 1.116 plaza egongo dira; gazteenentzako, berriz, 694 plaza.
Berrikuntzekin dator online bidezko salmenta, joan den urtean sarea erori egin baitzen “hainbeste jende batera” sartu zelako orrialdean, eta ondorioz, bost ordu baino behar izan zituzten sistema berriro martxan jartzeko. Joxeja Zabalo Betti Gottiko kideak gogoratu du “esfortzu handia” ekarri zuela sistemaren erortzeak eta herritarrengan “frustrazio handia” eragin zuela.
Erreserbak
Betti Gottiren sare sozialetan korreo elektroniko bat zabalduko dute eta kuadrillako ordezkariek bertara idatzi beharko dute. Mezua jaso dela jakinarazteko mezu automatiko bat jasoko dute mezua bidaltzen dutenek, eta sarrerak erreserbatuta geratuko dira, eta behin eskaerek plaza kopurua gainditzen dutenean, itxaron zerrenda zabalduko dute.
Erreserba onartu zaienek 48 ordu izango dituzte ordainketa egiteko eta hori egin ezean, erreserba deuseztatu egingo litzateke eta itxaron zerrendaren arabera esleituko dituzte erreserbak. Ordainketa egiteko esteka bat jasoko du kuadrillako ordezkariak. Prezioa pertsonako 20 eurokoa izango da. Behin ordainketa eginda, berriro konfirmazio mezua jasoko du ordezkariak.
Mezuan, zortzi datu eman beharko ditu kuadrillako ordezkari batek:
- 1- Zenbat sarrera erreserbatu nahi dituzten.
- 2- Menuari lotutako informazioa.
- 3- Kuadrillako ordezkariaren izen abizenak.
- 4- NAN zenbakia.
- 5- Kuadrillako ordezkariaren adina eta jaiotze data (pabiloia zehazteko).
- 6- Telefono zenbakia.
- 7- Korreo elektroniko bat.
- 8- Kuadrillaren izena.
Kamiseta eta goitibera lehiaketak
Aurten ere bi lehiaketa hauek egingo dira, herri bazkaria girotze aldera. Kamiseta lehiaketa joan den urtean berreskuratu zuten eta Asier Arbelaitz Antxeta irratiko marketing arduradunak oroitu du “ondo” atera zela. Aro berriko kamisetaren bigarren edizioa izango da aurtengoa eta kuadrillei dei egin die diseinuetan pentsatzen hastera. Prozedura eta sariak aurrerago jakinaraziko dituzte, bazkariko tiketen prozesua bukatzen denean.
Bazkarirako tiketak eskatzeko kuadrilla bakoitzak izen bat eduki beharko du eta izen hori bera kamisetetan identifikazio gisa erabiltzera ere animatu ditu kuadrillak Arbelaitzek. “Kolorez bete dezagun herri bazkariko ibilbide guztia, Urdanibiatik Ficobara, eta Ficobatik San Juan plazara.
Goitibera lehiaketa herri bazkariaren eguneko goizean egingo da San Martzial aldapatik behera. Dagoeneko goitiberen diseinuak pentsatzen hasteko proposamena egin du Arbelaitzek. Bestalde, emakumeei lehiaketa honetan parte hartzera dei egin die.
