Bidegorri sarea berritzeko 300.000 euroko aurrekontua onartu du udalak
Hiriko bost puntutan egingo dituzte obrak eta kasu gehienetan zintarriak kenduko dituzte. Horrez gain, bizikletak garbitzeko bigarren puntua instalatuko dute Puianan.
Baron de Oña kaleko obrak ikustera gerturatu dira. Bidegorriak hobetzeko eta zoladura berritzeko obrak hasi dira hiriko hainbat puntutan eta lan horiei buruzko informazio emateko agerraldia egin dute Gorka Alvarez Obretako udal ordezkariak eta Sergio Javier Mugikortasun Jasangarriko ordezkariak.
Alvarezen arabera, hiriko hainbat puntutan bidegorrien narriadura dagoela uste dute eta hau bidegorrien “erabilera handiagatik” dela uste du.Udaletxearen konpromisoa bidegorriak “mantentzea” dela esan du. Halaber, segurtasun baldintza guztiak betetzea eta “ahal den neurrian” bidegorriaren ibilbidea “luzeagoa” eta “osatuagoa” izatea. Aurrekotua 294.832,68 eurokoa da eta hiru hilabetetan egikarituko ditu lanak Excavaciones y transportes Orsa enpresak.
Beraz, bide horiek hobetzeko helburuz ekin diote lan hauei udal ordezkariaren aburuz. Horrez gain, pasa den astean Juan Thalamas Labandibar kaleko azken etxea eraisteari ekin zioten eta lan horiek baliatuta, bidegorri berri bat sortzeko asmoa adierazi du Alvarezek. “Behobia eta Azken Portu lotuko ditu, baita hiriaren erdigunearekin ere”, zehaztu du.
Bestalde, lan hauek “estrategia argi” baten parte direla adierazi du Javierrek “Irun jasangarriago, osasuntsuago eta konektatuago” sortzeko bidean. Bizikletaren erabilera sustatzeko lanean urteak daramatela nabarmendu du Javierrek eta adierazi du Mugikortasun Jasangarrirako Planean jada jaso dutela hiri barnean mugitzeko gehien erabiltzen den garraioa bizikleta dela, baita oinez ibiltzea ere.
Obrak
Hiriko bost puntutan egingo dituzte obrak: Behobia, Azken Portu, Aduana kalea, Baron de Oña lorategian (Martindozenea ondoan) eta Puianan. Kasu askotan zintarriak kenduko dituzte eta seinalizazioak berrituko eta berriro margotuko dituzte. Horrez gain, bideak gorriz eta beltzez margotuko dituzte espaloia eta bidegorria bereizita egon daitezen.
Aduana kalean Pio Baroja ikastetxeraino iristen den bidegorria 20 zentimetro zabalduko dute eta espaloiaren eta bidegorriaren arteko diferentzia deuseztatuko dute. Azken Portun, berriz, Juan Thalamas 37 zenbakitik, Azken Portu kiroldegi alboko komunetaraino berriro zolatuko dute bidegorria eta jarraipena emango diote horri. “Orain arte oztopoak zituen bidegorriak, esate baterako, Vertiz Ford kontzesionarioarena. Dena homogeneizatuko dugu”. Eremu honetan GI-636 errepidea dago eta horrekiko ezberdintzeko bidegorrian seinalizazioa marraztuko dute.
Bizikletak garbitzeko puntua
Meakan jarri zuten bizikletan garbitzeko lehen puntua 2022an eta gaur bigarrena jarriko dutela iragarri dute bi udal ordezkariek. Puianan instalatuko dute, ospitalearekin bat egiten duen bidegorriaren alboa. Kokapena erabakitzeko, mendiak izan dituzte aintzat edota mendiko bizikleten erabilpena. Puntu hau hesituta egongo da, urak ihes egin ez dezan eta kanal batzuk sortuko dituzte ur zikina bideratzeko eta ur putzuak ekiditeko.
