Bidasoko hezkuntza komunitatea elkarretaratzera dei egin dute hilaren 12rako
Irungo hiru guraso elkartek nabarmendu dute "eskola hobe baten aldeko borroka" hezkuntza komunitate osoarena dela. Hurrengo astelehenean mobilizatzera dei egin dute.
Eskola publikoetako hezkuntzaren alorreko langileek bost greba egun egingo dituzte hurrengo astean, hilaren 12tik 16ra. Baldin eta atzo eta gaur artean Hezkuntza Sailarekin egiten ari diren negoziazioek fruituak ematen ez dituzten.
Bidasoko hezkuntza komunitatea (Irun eta Hondarribia) antolatu egin dira eta hurrengo astelehenean (hilak 12) elkarretaratzera dei egin dute Irungo San Juan plazan, 18:00etan. Kalitatezko hezkuntza baten alde irtengo direla aurreratu dute eta “eskola hobe baten aldeko” borrokara atxikitzeko deia ere luzatu dute. Eskualdean ez ezik, hilaren 10ean Bilbon, Donostian eta Gasteizen egingo diren mobilizazioetan parte hartzeko eskatu dute.
Deialdi hauekin bat egin dute Txingudi Ikastolako guraso elkarteak, Eguzkitzako guraso elkarteak, Toki Alai eskolako Alaikiro guraso elkarteak eta Leka Enea eskolako guraso elkarteak. Babesa erakutsi diote hezkuntza publiko baten alde borrokan dabiltzan irakasleei. “Gure seme alabek merezi duten arreta eta kalitatezko hezkuntza bermatzeko baliabideak jokoan daude”, ohartarazi dute.
Hezkuntza publikoa bera jokoan dagoela salatu dute guraso elkarteek. Bide horretan, greba egunetan, berriro ere, ikasleen etorkizunaz hitz egiteaz gain, lan baldintzak hobetzea eskatuko dute hezkuntza sektoreko langileek, 2010etik berritu ez den hitzarmena berritzea, alegia.
Hezkuntza publikoa indartzea eskatuko dute gurasoek eta horretarako “ezinbestekotzat jo” dute inbertsioa handitzea, lan baldintzak hobetzea eta eskola publikoa baliabideez hornitzea. Hainbat neurri hartzea exijitu dute; hona hemen zerrenda: “ratioak txikitzea, hezkuntza laguntza beharretarako eta aniztasuna artatzeko baliabideak handitzea, plantillen egonkortzea eta gazte-berritzea, ordezkoen lana duintzea, zuzeneko eskola orduak murriztea, burokrazia murriztea eta abar luze bat”.
Eskaera horiek defendatzea ez dela soilik irakasleen kontua uste dute guraso elkarteek, baizik eta “ikasle, irakasle, eskolako langile eta guraso guztien” ardura dela iritzi dute.
