BATeko haurren taldea, DNA torneoko finalera
Dynamic New Athletics torneoa hilaren 17eta 18an jokatuko da Madrilen. BATeko ordezkariak bertan izango dira.
BATeko haur mailako taldea (2011 eta 2012 urte artean jaiotakoak), Espainiar estatuko 12 talde onenen artean sailkatu da, eta beraz, Madrilen jokatuko den DNA (Dynamic New Athletics) torneoaren finalean izango dira.
Guztira sei proba indibidual eta errelebo mixtoa burutu beharko dituzte: mutiletan 60 metro, luzera jauzia eta pisu jaurtiketa, eta emakumeetan 60 metro, altuera jauzia eta 60 metro hesiak. Erreleboa 4x200m izango da. Klubeko ordezkariei dagokienez, Kaiet Arruabarrenak, Ane Placeresek, Yuxuan Zhuk, Eider Eizagirrek, Nora Gonzalezek, Adur Muñozek, Adur Errazkinek eta Maren Martinek parte hartuko dute.
Finala hilaren 17an eta 18an jokatuko da, eta honako talde hauek izango dira BATeko ordezkarien kontra lehiatuko direnak: Club-escuela Zenit (Aragoi), Club Deportivo Estadio (Asturias), Tenerife Caja Canarias (Kanaria uharteak), UGE Badalona (Katalunia), Escuela Atletismo Arte Físico (Extremadura), U.M.A. (Madril), UCAM Atletismo Cartagena (Murtzia), Club Pamplona Atlético (Nafarroa), Colegio Mitreo (Extremadura), Escola FEDAC Lleida (Katalunia), eta Atletismo Arona (Kanaria uharteak).
Topaketa honen helburua “esperientziaz gozatzea” dela adierazi du klubak, eta eskerrak eman dizkiote “bereziki” Zaisa enpresari. Hari esker bidaiak dituen gastu guztiak estali ahal izan baitituzte.
Hurrengo hitzorduak
Asteburu honetan jokatuko dira Euskadiko Txapelketa Absolutua eta Distantzia Luzeko Espainiako Txapelketa.
Lehena Durangon izango da. Denboraldiko hitzordu garrantzitsuenetako bat da BATeko atletentzat. Eguerdiko 13:00etatik 20:00etara klubeko 40 atletek baino gehiagok parte hartuko dute.
Espainiako Txapelketa, berriz, Mao-n (Herrialde Katalanak) jokatuko da. Klubeko bi ordezkari izango dira bertan: Lucia Valero, 10.000 metroetan eta Isra Rahali, 5.000 metroetan.
