Zaldunbordaren inguruan sozialistek egindako afirmazioak gezurtatu ditu Abotsanitzek
Herri plataformako kideek zuzenketa publiko bat egiteko eskatu diote Hondarribiko PSE-EEri. Eta aldi berean, azken hilabeteetan sozialistak baliatzen ari den estrategia gaitzetsi dute.
Hilaren 5ean, astelehena, Hondarribiko PSE-EE alderdiak Zaldunbordaren inguruko ohar bat kaleratu zuen, HAPO berriak merkataritza gune bat ezartzeko “ateak irekitzen” zituela adieraziz. Abotsanitz Herri Plataformak datu zehatzekin gezurtatu ditu sozialistek egindako afirmazioak.
Lehenik eta behin, HAPO berriak Zaldunborda gainako eremua jarduera ekonomikoetara bideratzea proposatzen duela adierazi dute, “alegia, PSE-EEk eskatzen duen jarduera industriala da preseski sektorearen erabilera berezkoa”.
Hori esanda, hasieratik, macro outleta eraikitzeko aukera gezurtatu nahi izan dute. Azaldu dutenez, eremuan 40.000m2 eraiki daitezke guztira eta Saltoki Handien Lurralde Antolamenduari buruzko ekainaren 27ko 10/2019 Legean ezarritakoaren arabera, metro karratu horietatik gehienez 15.000 m2 bideratu daitezke merkataritza aktibitateetara, “beti ere plangintza berezi bat idatzi eta onartzen bada”.
Zentzu horretan, ziurtatu dute 15.000 m2 horiek ez lirateke “sekula” makro outlet bat eraikitzera bideratuko. Diotenez legeak Zaldunborda Gainako ezaugarriak dituzten sektoreetan saltoki singularrak bakarrik ezarri daitezkeela ezartzen baitu. Altzairu eta dekorazio saltokiak, ibilgailu kontzesionarioak eta gisa honetako aktibitateak ezarri dituzte adibide gisa.
Alegazioak
Sozialistek, gainera, HAPOri buruz egindako alegazioak udal gobernuak ezeztatu izana salatu zuen. Herri plataformako kideek, ordea, hondarribia.eus webgunean, alegazioaren kontsiderazio asko onartzen zituztela adierazi zietela nabarmendu dute.
Azkenik, inbertsore pribatuek bertan inbertsioak egin izanagatik Abotsanitz proiektuaren defentsa egiten ari dela iradoki zuten sozialistek. Baina Abotsanitzek dioenez, alegazioen erantzunetan ez dute inbertsore pribatuen aldeko defentsarik egin eta lurra garbitzeko beharraren zergatia azaldu dute: “Zehaztu behar da Zaldunborda Gainan lurzorua kutsatu duen legez kanpoko zabortegi bat egon zela, eta kutsadura hori deskontaminatu egin behar dela. Gainera, jarduera ekonomikoetarako sailkatu nahi diren gainerako guneekin batera, garraiobide nagusien ondoan dago, eta, adierazi den bezala, eraldatze-prozesuak jasan ditu. 2017ko Plan Orokorrak zonaldean merkataritza-gune handi bat ezartzea baimentzen zuen, eta, plana indarrean egon zen bitartean, sustatzaile pribatuek lurzorua erosi zuten eta zigilatzeko eta Plan Partziala idazteko lanei ekin zitzaien”.
Hori dela eta, herri plataformako kideek zuzenketa publiko bat egiteko eskatu diote Hondarribiko PSE-EEri.
Oharrarekin amaitzeko, azken hilabeteetan sozialistek hartu duten norabidea gaitzetsi dute: “Berretsi nahi dugu ez zaigula batere gustatzen ari Hondarribiko PSE-EEk azken hilabeteetan, higadura eta ezinegona sortzeko asmotan baliatzen ari den estrategia. Interes publikoaren defentsak izan behar du gure jardunaren oinarri legeak ezartzen duen markoaren barruan. Hondarribiak eta hondarribiarrek ez dute besterik merezi” esan dute.
