Bete-beteko egitaraua ondu du Euskaraldiko Herri Batzordeak
Euskaraoke herrikoian parte hartzeko izen ematea hilaren 11era zabaldu dute, eta herri bazkarirako txartelak eskuragai jarri dituzte Basque, Branka, Itxaropena eta Ttopara tabernetan.
Hilaren 29an bildu ziren azkenekoz Euskaraldia antolatzen aritu diren herriko eragile eta norbanakoak, azken xehetasunak zehazteko. Hilabete erabakigarria izango da maiatza, eta gaur du lehena. Beraz, hasi da atzera kontua!
Euskaraldia hilaren 15ean hasi eta 25ean amaituko da, baina orain artean egin bezala, hizkutza ohiturak aldatzea helburu duen egitasmoari hasiera eman aurretik hamaika ekintza antolatu dituzte. Herria eta herritarrak izan dituzte jomugan, norbanakoen eta entitateen izen ematea eta parte hartzea sustatzea helburu, euskarari ximiko lelopean.
Mahia inguruak, hitzaldiak, mintzodromoa, dantza… ekitaldi sorta oparoa izango da datozen egunetan herrian. Hilaren 8an, Olatz Altuna, Saioa Zabala eta Mikeldi Zeberio adituek euskarak herrian bizi duen egoera izango dute gogoetagai Euskararen erabilera Hondarribian: argiak eta itzalak deitutako mahai inguruan. Saioa Jaime Altunak gidatuko du. Hilaren 9tik aurrera Euskara eta artea erakusketa kolektiboa ikusteko aukera izango da, eta haur eta gurasoentzako Parketarrak egitasmoa lau ostegunetan gauzatuko dute.
Mintzodromo ibiltaria hilaren 15ean egingo dute. Egun berean Miren Agur Meabek hitzaldia eskainiko du, eta Kemen dantza taldeak edota Gaztelekuak ere jarduerak prestatu dituzte. Ikus egitarau osoa hemen.
Ahobizi eta belarriprest
Ahobizi zein belarriprest gisan parte hartuko dutenek txapa bereizgarria jantzi beharko dute hilaren 15etik 25era. Horiek jasotzeko hiru hitzordu prestatu ditu Herri Batzordeak. Aurreneko biak Portuan izango dira: hilaren 3an 11:00etatik 14:00etara, eta hilaren 10ean, 11:00etatik 14:00etara. Lehen hitzorduan, gainera, taberna ibiltariaren presentzia izango da herrian, eta haiekin bat egingo du Euskaraldiak. Bigarrenean, Hondarribiko Dantza Eskolak kalera irtengo dira eta prestatutako koreografiak dantzatuko dituzte.
Azkenik, hilaren 15ean txapa jartze ekitaldia egingo dute. Gogoratu dutenez, egun hori izango da Euskaraldian izena emateko azken eguna. Orain artean 700 pertsonatik gora norbanakok eman dute izena egitasmoan, eta 120 entitatek.
Euskaraoke herrikoia
Herri kontzientzia piztu eta ohiturak aldatzeko mugarria izatea nahi dute Euskaraoke herrikoia. Hilaren 24an izango da. Hitzordua gainera, ez da jarduera horretara mugatuko, egun osoko ospakizuna prestatu baitute. 12:00etan erromeria egongo da, 14:00etan bazkari herrikoia egingo dute eta 16:00etatik aurrera Euskaraokeari su emango diote. “Euskal kantak eta nortasuna pizteko sugar bilakatu nahi ditugu egitasmo horiek” esan dute.
Berez, gaur amaitzekoa zen izena emateko epea, baina hilaren 11era zabaldu dute. Antolatzaileek zehaztu dutenez, parte hartzeko beharrezkoa da webgunean dagoen orria betetzea, egunean bertan ez baita inprobisatzeko aukerarik izango. Bakarka zein taldean hartu daiteke parte. Hiru kanta hautatu, eta zer ordutan aritu nahi duen zehaztu behar da.
Herri bazkaria Blagan elkarteak antolatuko du. Txartelak atzo jarri zituzten eskuragarri 15 euroan, Basque, Branka, Itxaropena, eta Ttopara tabernetan.
