Oiasso Museoko terma erromatarren inaugurazioa, hilaren 11n
Hilaren 11n 17:00etan egingo dute inaugurazio ekitaldia, eta horren ostean asteburu osoan zehar egingo dituzte bisita gidatuak. Okasioa baliatuz, 'Paseo bat gure historian barrena' kanpaina abiatu du Udalak.
Terma erromatarrak inauguratzeko ekitaldia aurkeztu dute Cristina Laborda alkate eta Nuria Alzaga alkateorde eta Kulturako ordezkariak: hilaren 11n, 17:00etan, Oiasso Museoan izango da.
Inaugurazioaren ondotik, asteburu osoan zehar egongo da “harribitxi arkeologikoa” deskubritzeko aukera. Doako bisita gidatuak egingo dituzte hilaren 12 eta 13an, eta txartela museoaren webgunearen bidez eskuratu daiteke.
Terma hauek “hiria kalitatezko turismo lehiakorraren helmuga gisa ikusarazteko bultzada handia” izango delakoan daude, are gehiago “Aste Santua ate joka dugun honetan”.
Termak berreskuratzeak 3.500.000 euroko aurrekontua eskatu du, horietatik 2.000.000 NextGeneration EU planaren bidez eskuratuak. Egungo museoa handitu eta ondoko lurzatira zabaldu dute, eta hortaz, baita museoaren ibilbidea luzatu ere. Egungo eraikinaren atzeko irteeratik hasiko da ibilbide berria, “egungo eraikina eta berria lotzen ditu, eta Junkal parrokiari behatzeko plataforma bat dauka. Era berean, aztarnei begiratzeko plataforma zentral bat eta larrialdietako irteera baten bidez plaza berria eta Sarasate karrika lotzeko beste pasarela bat eraiki dira. Bestalde, eraikin berriak beirate handiak ditu, bisitariek aurriak haratago hedatzen direla ikusteko”.
Gainera, Irun helmuga “adimenduna” bilakatzera bidean museoa digitalizatu dute.
Inaugurazioa baliatuz, Paseo bat gure historian barrena kanpaina abiatu dute Irungo Udalak. Irungo faroletan hiriaren historia erromatarra agerian jartzen duten irudidun banderatxoak jarri dituzte. Irunbuseko markesinetan publizitatea ere jarri dute.
Inaugurazioa ospatzeko birritan egingo dute aurten erromatar pintxoaren ibilbidea: lehena, datorren astean, eta bigarrena, Dies Oiassonis jaialdian. Hiriko hainbat taberna eta jatetxek erromatar garaiko sukaldaritzan oinarrituak diren pintxoak prestatuko dituzte, gaur egungo zaporeekin nahastuta. 17 establezimenduk egin dute bat erromatar pintxoaren ibilbidearekin.
