Euskaltegietako ikasleen diru laguntzak ordaintzeko eskatu du EH Bilduk
2024ko udal diru laguntzak oraindik ez ordaindu izanak euskaltegietako ikasleak haserretu ditu. Iazko aurrekontuaren likidazioa dagoeneko egina dagoenez, dagoeneko egin daitezke atzeratutako ordainketak.
Aurreko ikasturteko euskaltegiko klaseen aprobetxamendua frogatu dezaketen ikasleek matrikularen hein bereko udal diru laguntza jaso dezakete. Baina, 2024ko diru laguntza oraindik ez du ordaindu Udalak, eta ikasleen haserrea eragin du honek.
Otsailean Udal Gobernuak “2024 urteari dagozkion ordainketak epez kanpo egin beharko zituela” adierazi zuen, ordainketak egin aurretik aurrekontuaren likidazioa egin behar baitzuen. Hala ere, EH Bilduk jakinarazi du dagoeneko likidazioa egina dagoela, eta beraz, “atzeratutako ordainketei aurre egiteko aukera egon badagoela”.
Hori dela eta, EH Bilduk Udal Gobernuari diru laguntzak ordaintzeari lehentasuna ematea eskatu dio. “Euskara ikasteko hautua egiten duten irundarrek errespetua merezi dute eta Udal Gobernuari bere betebeharrak lehenbailehen bete ditzan eskatzen” diote. Gainera, “euskararen ikaskuntza sustatzeko neurri esanguratsua da”.
