Elkarrekin Irunek ez du Segurtasun eta Bizikidetza Mahaira itzultzeko asmorik
Otsailean utzi zuen Elkarrekin Irunek Segurtasun eta Bizikidetza Mahaia, eta hilabete eta erdi ondoren "ez da ezer aldatu" Nuñoren arabera. Arazo bat dagoela kontuan ez hartzea leporatzen diote Udal Gobernu eta alkateari.
Elkarrekin Irunek Segurtasun eta Bizikidetza Mahaia utzi zuenetik hilabete eta erdira, batzorde “deskafeinatua” dela deitoratu dute. Izan ere, aurrerapausorik ematen ari ez zirelako utzi zuten mahaia, eta geroztik udal taldeen arteko bilerak egin baldin badituzte ere, “ez da ezer aldatu”.
David Nuñok, Elkarrekin Iruneko bozeramaileak, Udal gobernuak eta alkateak arazoari ez diotela behar duen garrantzia ematen salatu du, “parte-hartze apal eta gardentasun gutxiko batzordea ondorioztatu duten hiru bilera egin” ostean. Segurtasunaren Plan Estrategikoaz arduratuko den enpresa aurkeztu zuen Udalak, baina, ez zegoen enpresari buruzko baloraziorik egitea ahalbidetzen zuen inolako dokumenturik, Nuñoren arabera.
Segurtasun eta Bizikidetza Mahaiaren funtzionamendua hobetze aldera, “aurkeztu aurretik kolektiboekin kontrastatzen ari diren hobekuntza proposamen dokumentua lantzen” ari da Elkarrekin Irun.
Horregatik, Elkarrekin Irunek “herritarrak asko kezkatzen dituen arazoa eteteko elkarrekin lan egiteko” borondatea baldin badu ere, “ez baldin badute egoera arduraz hartzen, Elkarrekin Irun Segurtasun eta Bizikidetza Itunera itzultzetik urrun dago”.
