Biok Txingudi eta Txingudi/Orereta/Baztan taldeak, lehiakor asteburuan
Biok Txingudi taldeari garaipenak ihes egin zion azken minutuetan. Txingudi/Orereta/Baztan taldeak, berriz, aise irabazi zuen Hernani/Atletiko San Sebastianen kontrako partida.
Biok Txingudi taldea.Txingudi Errugbi Kluba Lehen minututik, aurrelarien nagusitasuna baliatuz, baloia azkar mugitu zuten etxekoek, eta laugarren minutuan markagailuan aurretik jartzea lortu zuten. Zazpigarren minutuan, berriz, Durangoko taldeak kontraerasoa egin eta partida berdintzea lortu zuten. Hurrengo minutuetan defentsa lan handia egin zuen Biok Txingudi taldeak, erasoan, ordea, jokaldiak ondo bukatzea falta zitzaien.
Bigarren zatian Durangoko taldearen partetik intentsitate handiagoa sumatu zuten etxekoek, eta berrogeita seigarren minutuan defentsa harresian zuloa aurkitu eta bost puntu gehiago egin zituzten durangarrek. Biok Txingudik ez zuen amore eman eta jokaldiak egiten ahalegindu zen. 79. minutuan, Paola Vegak beste entsegu bat egin eta bizkaitarrengana gerturatzea lortu zuten (17-22).
Partida irabazteko ahaleginak ez ziren nahikoak izan, baina hala ere, zazpi puntu baino gutxiagogatik galdu izanagatik, puntu gehigarri bat eskuratu zuten etxekoek. Hala, hamabost punturekin, laugarren kokatu dira sailkapen orokorrean. Ligako azken partida Iruñean jokatuko dute bi aste barru La Unicaren kontra.
Hamabostekoa Zumendi Carok, Lupe Pescadorrek, Maren Santa Cruzek, Lur Gastonek, Camille Burosek, Garazi Santosek, Lea Etxebarrietak (kapitaina), Miren Fernandezek, Leire Muñozek, Enara Arrutiek, Ane Novok, Alba Saizek, Uxune Aranburuk, Laida Rodriguezek eta Jessica Gomezek osatu zuten. Saioa Gartzia, Lucia Duran, Maddalen Alberdi, Lohitzun Aia, Iara de Almeida, Paola Vega, Naroa de la Fuente eta Irati Beraiz, berriz, aulkian hasi ziren.
14 urte azpiko taldea, finaletik gertuago
Txingudi/Orereta/Baztan taldeak Gipuzkoako finalerdietako partida jokatu zuen larunbat goizean. Hernani/Atletico San Sebastian taldea izan zuten aurkari. Partida aise irabazi zuten txingudiko, oreretako eta baztango jokalariek. Nahiz eta aurkariek lehiaren azken minutuetan aldea murrizten jakin izan zuten, etxekoek, 35 puntuko aldearekin irabazi zuten, eta alde hori nahikoa izango dute itzulerako partida “erosoago” jokatzeko. Partidu hori asteburu honetan jokatuko dute, Hernanin.
Taldea Markel Aizpuruak, Unai Aizpuruak, Telmo Bereciartuak, Aiur Callaok, Markel Celestinok, Giovani Ciurarek, Galder Eizaguirrek, Omar El Mossaouik, Oier Goenagak, Greta Gutierrezek, Goretti Lekuonak, Urtats Mendizabalek, Markel Orbegozok, Annie Pascaruk, Urko Prietok, Oihan Sanchezek, Beñat Tristanek, Marcos Viñuelak eta Oreretako Xian Aizpuruak, Eki Galarragak eta Enai Irastorzak eta Baztango Pau Martinezek osatu zuten.
