Neguko azken test estropadan lehiatu dira Hondarribiarrak
Hondarribia Arraun Elkarteko hiru traineruak lehiatu ziren atzo Sanpedrotarrakek antolatutako jaitsieran. A taldeak 7. egin zuen, Emakumeen taldeak 9. eta B ontziko gazteek 19.
Hondarribia A trainerua Pasaiako uretan.Jose A. Rodriguez Atzo goizean jokatu zen San Pedroko test estropada. Neguko aurre denboraldiari bukaera ematen dion hitzordua. Guztira 38 ontzi uretaratu ziren, horietako bi ordea, sailkapen ofizialetik kanpo aritu ziren: Ilunbeko beteranak eta San Pedroko gazte mailako emakumeak.
Eguzkitsu esnatu zen eguna, eta launbateko haize bortitza atzean utzita arraunerako egun aproposa izan zuten arraunlariek. Pasaiako bokale aldean urak zertxobait mugituta bazeuden ere barnealdean bare-bare zeuden. Goizeko 11:00ean irten zen aurreneko ontzia, Ilunbeko beteranak, eta 12:39ean Bermeo izan zen irteten azkena. Traineruak erlojupeko modalitatean lehiatu ziren.
Emakumezkoen kategorian Tolosaldeako ontzia izan zen azkarrena (11:04,55). Arraun Lagunak ontzia, iazko EuskoTren ligaren eta Kontxako banderaren irabazlea, bigarren sailkatu zen. Tolosaldeak baino 7,82 segundo gehiago behar izan zituzten. Hirugarren Orio izan zen, kronoa 11 minutu eta 17 segundoan geldituta. Hondarribiarrak bederatzigarren helmugaratu ziren. Denborari erreparatuta ordea, taldeen artean maila berdintsua dagoela ikus daiteke. Segundo gutxiren bueltan daude Zumaia (11:33,25), Donostiarra (11:36,22), Hibaika (11:38, 91) eta Hondarribia (11:41,89). Udan beraz, EuskoTren ligan, borroka estua izango dute ziur.
Sailkapenean sorpresa eman zutenak sanjuandarrak (11:27,48) izan ziren. ETE ligan arituko dira aurten eta orotara bosgarren bukatu zuten, EuskoTren ligan arituko den Astilleroren (11:26,50) atzetik.
Gizonezkoetan Orio nagusitu zen Pasaian. 20:22,11 minutu behar izan zituzten ibilbidea burutzeko. Bigarren Zierbena, horiengandik 14,33 zentesimetara (20:36,44), eta hirugarren Donostiarra 19,73 segundotara (20:41,84). Sailkapen orokorrean Hondarribia A ontzia zazpigarren helmugaratu zen (21:04,12). Hondarribia B ontzia aldiz, 19. denbora onena egin zuen, kronoa 21:47,69an geldituz.
Jarraian, atzoko estropadetako sailkapen oso-osoak.
San Pedroko XVI. Test Estropada. Emakumeen, gazteen eta beteranoen sailkapenak.
San Pedroko XVI. Test Estropada. Gizonen sailkapenak.
Segidan, Hondarribiko traineruen atzoko irudiak, Jose A. Rodriguezek egindakoak, eta HITZAk haren sare sozialetatik jasoak.
Youtuben ere estropada ikusgarri dago Chicho y Toni-ren kanalean.
