Beloagan, historiaz janzten
HITZAren Igandean Historiaz Jantzi bisita gidatuen egitasmoaren barruan, Oiartzungo Beloaga gaztelura irteera egin zen atzo.
Igandetan Historiaz Jantzi HITZAren bisita gidatuen zikloaren barruko irteera egin zen atzo (hilak 30) goizez, Oiartzungo Beloaga gaztelura. Goiz oso atseginean, 11:00etan bildu zen HITZAkide talde bat Oiartzungo plazan Beloaga alderantz joan, eta tokia nahiz duen historia ezagutzeko prest. Plazatik Learreko malda igo zuten, Urkabe zeharkatuz Gurutze auzoraino iritsi, eta han ondoan zen gazteluan bukatu zuten bidea.
Lehen geldialdia Andrearriaga izeneko estelaren aurrean egin zuten, Arkale mendiaren hasieran. Benetako estela San Telmoko Museoko erakusketa iraunkorrean badago ere, herritar batek sortu zuen erreplika da atzo ezagutu zutena, Oiartzungo ondarearen altxor hori topatu zen lekutik gertu ikusi ahal izateko. Menditik gora iritsi ziren Beloagara.
Gaztelua auzolanaren bitartez partzialki berreraiki zen, eta berriki Oiartzungo Udalak egokitu egin du besteak beste hainbat pasabide eta eskailera jarriz. Nafar jatorriko gaztelua da, eta haren historiaz jabetu ziren irteerarekin bat egin zutenek, kroniketan eta gutunetan izan dituen aipamenen kronologia jarraituz. Nafarroako Erresumaren mendebaldearen 1200eko konkistaren kronika batean agertzen da Beloagari buruzko lehen idatzia, baina ezin da kokatu zehatz noiz eraikia izan zen. Ezta noiz eraitsia izan zen ere, nahiz eta jakina izan 1512eko konkistako agirietan ez dela gazteluaren berririk.
Gaztelutik jaitsi, eta Arkale mendia zeharkatzen duen bunkerrean sartu ziren, Francok sortu zuen Valle Espin defentsa lerroaren parte zenera. Jarraian, iaz eraiki zen trabajadoreen barrakoiaren erreplika ezagutu zuten, gogoratuz 3.000 izan zirela Oiartzunen izan ziren frankismoaren esklaboak, eta horietatik zortzi fusilatuak izan zirela.
Hurrengo Igandean Historiaz Jantzi apirilaren 27an egingo da. Errenteria-Oreretako Fanderiako errota ezagutzeko aukera izango dute hala nahi duten HITZAkideek eta haien lagunek. 20 pertsonarentzako tokia izango da.
Beloagako bisitaren eskuorria lortu nahi izanez gero, baliatu esteka hau. Behean, atzoko bisita gidatuaren hainbat irudi.
