54 hondarribiarrek Gurs-eko kontzentrazio esparruan jasan zutena ezagutarazteko hitzordu bikoitza apirilean
'Gernika berri-ren amets zapuztua' erakusketa eta hitzaldi bat antolatu du udalak. Azken hau, Josu Chueca Intxusta historialariak eskainiko du.
Gurseko kontzentrazio esparrua. Hondarribiarrak Gurs-eko kontzentrazio esparruan gertatu zenera hurbiltzeko hitzordu bikoitza antolatu du Hondarribiko Udalak. Zehazki, 54 hondarribiar gizon eta emakume igaro ziren 1939-1941 bitartean Hondarribitik 123 kilometrora dagoen Gurs herrian dagoen kontzentrazio esparrutik, eta horiek bertan bizitutakoa ezagutaraztea da asmoa.
Horretarako bi aukera izango dira. Lehena apirilaren 1etik 13ra izango da. Arma plazako goiko solairuan, Gernika berri-ren amets zapuztua erakusketa izango da ikusgai. Gernikako Bake Museoak Josu Chueca Intxustarekin batera osatutako erakusketa da eta lau hizkuntzetan dago jasoa.
Bigarren hitzordua apirilaren 4an izango da, Hondarribiko kultur etxean, 19:00tan. Josu Chueca Intxusta historialariak Gurseko gertakizunak eta Hondarribiarrek bertan bizi izandakoak azalduko ditu elebitan izango den hitzaldi baten bidez.
Hortaz gain, herriko gazteak ere errealitate hartara gerturatzeko eta hondarribiar batzuen bizipenak zuzenago ezagutzeko saiakera egingo dute ere: unitate didaktiko bat sortu eta Gurseko konzentrazio esparrura bisita egiteko bidai bat antolatu dute.
Historialari taldea
Hondarribiko Udaleko Bizikidetza Batzordeak eskatuta, Koldo Ortega, Joxerra Enparan, Aitzol Arroyo eta Pedro Barruso historialariak Hondarribiko memoria lantzen aritu dira, eta haiei esker, Memoriaren astea (2021ean eta 2023an), Memoria lekuak (2021ean) edota 1936an kargugabetutako Hondarribiko alkate, zinegotzi eta udal langileei aitortza eta erreparazio ekitaldia (2024) bezalako egitasmoak burutu zituzten. Baita, 20/2022 Memoria legearen harira, Pedro Muguruzari seme kuttun izendapena kentzea edota Francisco Sagarzazuren bustoa Udal Batzar Aretorik kentzea lortu ere.
Hondarribiko Udaletik, beraz, eskerrak eman dizkiete “agertu duten prestutasun eta laguntza orogatik ekitaldi hauek antolatzeko orduan”.
