Bidasoko irakasleek beste dei bateratu bat egin dute
Aste honetan greba egingo dute apirilaren 1ean eta 2an. San Juan plazan elkartuko dira Irun eta Hondarribiko hezkuntza publikoko langileak.
Pasa den astean bi greba egun egin zituzten hezkuntza publikoko irakasleek eta urteetan lehen aldiz elkarretaratzeko dei bateratua egin zuten Irungo irakasleek. Deialdi honetara Talaia ikastetxeko irakasleek ere bat egin zuten. Erantzun zabala izan zuen kontzentrazioak eta aste honetan, apirilaren 2an, San Juan plazan berriro elkartzeko deia luzatu diete Bidasoko irakasleei, 11:00etan.
Besteak beste, hitzarmena berritzea eskatzen dute, 2010etik berritu ez dena. Horrez gain, hezkuntza publikoko langileen lan baldintzak hobetzea eskatuko dute. Steilas, LAB, ELA eta CCOO sindikatuek gaur ohar batean jakinarazi dute ez dutela aste honetako grebak bertan behera utziko, pasa den astelehenetik Hezkuntza Sailak ez duelako proposamen berririk egin, ezta mahai negoziatzailerik deitu ere.
