Alardearen inguruan hitz egiteko bigarren saioa, hilaren 13an
Saioan parte hartzeko epea zabalik dagoela gogorarazi du udalak; martxoaren 10ean itxiko dute.
Alardearen inguruan hitz egiteko dinamikak antolatuko zituela iragarri zuen Hondarribiko Udalak otsailaren 5ean eta handik astebetera egin zuten lehen saioa, otsailaren 13an. Itsas Etxea Auditoriumean egin zen eta “Alardeak gaur egun duen esanahiaz itauntzen zuten galderen emaitzen inguruan” hausnartu zuten.
Bigarren saio irekia datorren astean egingo dute, hilaren 13an, 18:00etan, eta bertan gaur egun “herritarrek ze bide ikusten dituzten” gaia izango dute hizpide. Saioan parte hartzeko epea zabalik dagoela gogorarazi du udalak. Hilaren 1ean zabaldu zuten eta martxoaren 10ean itxiko dute.
Izen emateko udal webgunean dagoen formularioa bete behar da eta 40 pertsona baino gehiagok izena ematen badute, adin eta sexu aniztasuna bermatzeko erabakiak hartuko dituztela zehaztu du udalak. Parte hartzaileek posta elektroniko bidez jasoko dute baieztapena.
Hausnartzeko saioak
Saio horiek inkestaren emaitzen inguruan hausnartzeko bideratutakoak direla gogorarazi du udalak, “alegia, ez dira erabakiak hartzeko guneak”.
