Amonan Xalda Beruak irabazi du 2025eko parodien proba
Gipuzkoa plazan egin ziren aurrenekoz Hondarribiko Olinpiadetako parodiak. Ehunka herritar gerturatu ziren olinpiadetako 15 taldek prestaturikoak ikustera.
Inauterien bezperan egin zuten Hondarribiko Herri Olinpiadetako bosgarren proba, parodiena. Probarik estimatuena da honakoa; izan ere, olinpiaden hasieratik, urtez urte, ez du hutsik egin.
Hasiera batean Txantxangorri tabernaren ondoan egiten ziren. Ondoren, Jostaldin eta Soroetan ere egin izan dira. Baina aurten kokapen berri bat izan dute parodiek: Gipuzkoa plaza.
Proba kuttuna dela argi geratu zen ostiralean. Gipuzkoa plaza toperaino bete zuten olinpiadetako parte hartzaileek ez ezik, ikuskizunaz gozatzera joan ziren ehunka herritarrek ere.
15 taldek parte hartu zuten guztira, nahiz eta olinpiadetan 27 taldek parte hartzen duten. Kiroldegiko eztanda, erregeak, arraunlarien eta boxealarien arteko borroka, frutak, turistak erdigunean zituzten esketxak… denetik antzeztu zuten oholtza gainean. Horiek guztiak baloratzearen arduradun izan ziren herriko lau irakasle.
Komite olinpikoak “oso balorazio ona” egin du iragan ostiraleko ekitaldiaz. “Lekua perfektua da horretarako eta soinu aldetik ere oso ondo entzuten zen, ez aurreko urtean bezala” esan dute.
Sailkapena:
1- Amonan xalda berua: (108 puntu)
2- Josu Belea (eta Mixikuak): (104 puntu)
3- Atletic club txiplau: (103 puntu)
4- Hau komeriya: (98 puntu)
5- Berberiñak: (92 puntu)
6- Tximista: (91 puntu)
7- Txikhotia: (87 puntu)
8- Eruak heldu ttuk: (87 puntu)
9- Xiraldoka itxera: (86 puntu)
10- Faki ta faki: (84 puntu)
11- Gureak egin du: (84 puntu)
12- Txirrisklasikoak: (81 puntu)
13- Hau ginga: (73 puntu)
14- Non duk pistatxito?: (63 puntu)
15- Durum mixtua: (60 puntu)
