Hondartza kirol guneko lurrak udalari lagatzeko prozesua hasi du Espainiako Gobernuak
Trantsizio Ekologikoaren eta Erronka Demografikoaren Ministerioak kudeatzen ditu egun Hondartza Kiroldegiko lurrak. Lagapen horri esker udalerriak instalazioak eguneratu ahal izango dituela adierazi dute sozialistek.
Hondartza kiroldegia Trantsizio Ekologikoaren eta Erronka Demografikoaren Ministerioaren jabetzakoa izan da orain arte, baina Hondarribiko PSE-EEk jakinarazi duenez, jabari publikoko ondasun horiek “beharrezkoak ez direla” deklaratzeko espedientea abiatu du ministerioak.
Espediente horrek Hondartza kirol guneko lurrak Hondarribiko Udalari lagatzea ahalbidetuko du. Baina hori egin baino lehen jabari publikoaren desinfekzioa izapidetuko dutela azaldu dute sozialistek, baita eremu horretako mugaketaren berrikuspena egitea ere.
Hondarribiko PSE-EEk adierazi duenez “oso beharrezkoa” izango da lur horien lagapena egitea, udalerriak instalazioak eguneratu ahal izatea ahalbidetuko duelako. Jakinarazpen horren aurrean, beraz, pozik agertu dira sozialistak.
San Lorenzo urmaela
Iosu Alvarezek, sozialisten bozeramaileak, baieztatu duenez, San Lorentzo urmaela handitzeko proiektua Aire Segurtasuneko Estatu Agentziaren zain dago (AESA). Urmaelaren tamaina biderkatzea aurreikusten du proiektu horrek,”marea sistemarekin harreman zuzena irabazteko”. Aldi berean, Txingudiko naturaguneen arteko lotura hobetzea ahalbidetuko du ere proiektuak.
AESAk proiektua onartu ondoren, Trantsizio Ekologikoaren eta Erronka Demografikoaren Ministerioak obra lizitatzea besterik ez litzateke faltako.
