Bidasoko aparkalekua ezin dela negoziatu salatu du batzorde kudeatzaileak
Eskola patioa ikasleen garapen egokirako "beharrezko eskubidea" dela defendatu dute. Erabakia berriro aztertzeko eskakizuna egin diote Osasun Sailari.
Bidasoa Lanbide Heziketako Batzorde Kudeatzailearen arabera, bertako aparkalekua eta eskola patioa ezin direla negoziatu salatu du. Ikastetxeko patioa ez da “kapritxo bat” eta “beharrezko eskubidea” dela ikasleen garapen egokirako defendatu dute. Erakundeek ez dutela huts egin behar Hezkuntza Komunitate honekiko betebeharrean uste dute.
Aparkalekua osagarri diren jarduerak egiteko aisialdirako gunea dela azaldu dute, Smart Etxea teknologia berrien ikasgela erabiltzeko espazioa den bezala. Horrez gain, ikasleek instalazio elektrikoen erretenen praktikak patioan dauden tabikeetan egiten dituzte.
Bestalde, argitu nahi izan dute ikastetxeko batzorde kudeatzailea ez dagoela osasun zentroaren eraikuntzaren kontra; “uste hori guztiz okerra da”, salatu dute. Aitzitik, osasun zentroaren “alde” daudela nabarmendu dute, baina hirugarrenei kalterik egin gabe.
Bide horretan, erietxe berria Bidasoa Lanbide Heziketako eta udal jabetzako beste espazio batean kokatzeko eskatu dute. “Seguru gaude horrelako espazio bat badela”. Osasun Sailak hartutako erabakia berriro aztertzeko eskakizuna egin dute.
Ikastetxeak hazteko beharra daukala azaldu du batzordeak eta Sindikatu Etxe zaharra horretarako baliatzeko aukera berriro ekarri dute eztabaidara. Aitortu dute proposamen hori egin zutela, baina inondik inora ez zuten imajinatzen proposamen horrek “patioa arriskuan” jarriko zuenik.
Ikastetxeak “beti” eduki du handitzeko beharra, berrikuntza “sakonen” ondorioz. Makina industrialen eta pertsonen kontzentrazio handia izan dute, eta eraikina egiteko erabili zen gainkarga gainditzeko zorian egon dela oroitu dute. Horrek arriskua zekarrela ohartarazi dute eta hargatik eraikina indartu behar izan zuten 40 zentimetroko altuerako T formako bikoitzekin.
Obra horiek ikasturtea eten gabe egin zuten. Lanbide Heziketak hamahiru orduz dago zabalik eta eskualdeko industria sarearen garapena ahalbidetu dutela balioan jarri dute.
