Pintaketa arrazista eta xenofoboak gaitzetsi ditu udalak lehen aldiz
Palmera Montero gunean eta Uranzu kalean agertu diren azken pintaketen harira egin du gaitzespena udalak. Hirian zehar abendutik hainbat dira agertutako pintaketak eta egindako eraso faxistak. Salaketa elkarretaratze bat ere egin zen.
2021ean ekitaldi antifaxista egin zuten Urdanibia plazan. Irungo Udalak adierazpenak egin ditu lehenbizikoz hirian agertu diren pintada neofaxista eta arrazisten gainean. Gogoratu beharra dago hirian abendutik ari direla horrelako pintaketak agertzen, hala nola, Katea eta Santiagoko pilotalekuetan eta Letxunborro hiribidean. San Migel auzoko supermerkatu bati ere eraso egin diote, edota Irungo Harrera Sareak mahaia jarri ohi duen lekuan sinbolo nazi-faxista bat agertu zen.
Lakaxita gaztetxean ere agertu ziren pintaketak –behin baino gehiagotan–, eta Moskuko gaztetxeko kideek bezala faxisten eraso zuzenak ere jasan dituzte Lakaxitako kideek. Egoera honen aurrean, Urdanibia plazan San Tomas egunean elkarretaratzea egin zuten faxismoa gaitzesteko. 200 bat herritarrek egin zuten bat deialdiarekin eta udal gobernuko ordezkaririk ez zen agertu bertan.
Gaur, Palmera Montero gunean eta Uranzu kalean agertu diren pintaketa arrazista eta xenofoboen harira, horrelako ekintzak gaitzesteko adierazpena publiko egin du udalak. Horrelako ekintzek ez dutela lekurik “egungo gizartean” azaldu dute, eta udalaren esanetan bizikidetza “oztopatu” egiten dute.
Herritar guztiak errespetatzeko eskaria egin du jarraian PSE-EEk eta EAJk osatzen duten udal gobernuak, eta hiriko espazioetan “gizatasunez” jokatzea eskatu dute, baita herritar guztiak errespetatzea galdegin ere, “jatorria edozein dela ere”.
Bien bitartean, Bor Bor hausnarketa politikorako plaza taldeak bultzatuta jardunaldiak egiten ari dira, eta eskuin muturrari auzoetatik aurre egiteko formakuntza plazak antolatu dituzte. Bigarren saioa gaur izango da Kateako Errepublika Garaiko Eskola Zaharrean, 18:30ean: Euskal Herria autoritarismoaren gorakadaren aurrean hitzaldia eskainiko du Iratzar Fundazioko Iker Eizagirrek.
