Ez dituzte aurrekontuak onartu
Bozeramaileen Batzordea gaur goizean bildu da aurrekontuak onartzeko, baina proiektuak nahikoa babes ez zuela ikusita, udalbatzarrean "mahai gainean" utzi du proposamena gobernu taldeak.
Gaur goizean osoko bilkura egin dute udaletxeko areto nagusian, eta 2025. urteko udal aurrekontu orokorraren hasierako onarpena eztabaidatu behar zuten. Baina, ez dute onartu; ezta eztabaidatu ere. Aurrekontu proiektuak ez du behar adina babes, beraz, aurrerago eztabaidatuko dute. Nuria Alzaga lehen alkateordea: “Arduraz jokatu eta mahai gainean utzi dugu gai hau, lanean jarraitu eta ahalik eta adostasun handiena lortzeko”. Bilkura egin da, baina minutu eskasekoa izan da, aurrekontuak aztertzeko gaia mahaiaren gainean utzi duelako Cristina Laborda alkateak. Aurretik izan den bozeramaileen batzordean berretsi du gobernu taldeak euren proposamenak ez zuela nahikoa babesik izango.
Lehenengo alkateordeak hilabeteetan talde politiko guztiekin aurrekontu gaietan egindako lana defendatu du. “Hilabeteak daramagu talde politiko guztiekin hitz egiten eta negoziatzen. Aurrekontu proiektuak talde guztien proposamenak hartzen ditu barnean, eta, batez ere, Irunez eta irundarrez dihardu”.
Bestalde, Alzagak udal kontuak aurrera ateratzearen garrantzia nabarmendu du. “Aurrekontuak onartzea funtsezkoa da hiriak aurrera egiten jarraitu ahal izateko, eta ardura guztiona dela ulertu behar dugu. Ahalegin guztiak egitea merezi du Irunek, eta hiriak aurrera egiten jarraitzeko formulak bilatzea. Gu hitz egiten jarraitzeko eta adostasun handiena lortzeko prest gaude”.
