Hurbileko salmenta sarea indartzeko, udal bonoak
Aste honetatik hilaren 23ra bitarte izango dute establezimenduek egitasmora atxikitzeko aukera. Herritarrek, berriz, urtarrilaren 6ra arte jaso ahal izango dituzte.
“Herriko merkataritzan eragiteko eta herriaren bihotza diren saltoki txikiak laguntzeko” udal bono kanpaina abiatu du Hondarribiko Udalak. Aste honetatik hilaren 23ra bitarte izango dute establezimenduek egitasmora atxikitzeko aukera. Herritarrek, berriz, urtarrilaren 6ra arte jaso ahal izango dituzte. Guztira 10euroko 4.769 bono banatuko dituzte. Horien bidez hurbileko salmenta fisikoaren sarea indartzea da kanpainaren helburua.
Honakoa gauzatzeko 47.690 euro bideratu ditu udalak. “Bertako merkataritzaren garrantzia oso handia da eta ikusita merkataritza soilik eremu handiko guneetan igotzen ari dela, iniziatiba hau aurrera ateratzea ezinbestekoa zaigu” adierazi du Estitxu Urtizbereak kanpainaren aurkezpenean.
Orain artean hamazazpi denda atxikitu dira: Zuloaga oinetakoak, Canela, Higer Optika, Heme Shop, Olatz bitxidenda, Kuttuna Boutique, Nanai, Hiruarri, Ortoleku, Pascua, Villatijeras ile apaidegia, Rezola bitxidenda, Sirene, Soule, Spa Sokoa eta Xera lentzeria. Zerrenda eguneratua udal webgunean ikus daiteke. Gainera, aurten denda mota gehiago batu ahal izango dira kanpainara, dendarien laguntzarekin epigrafeak zabaltzeko lana egin baitute.
Maria Carrera Amuitz Merkatarien elkarteko lehendakaria ere aurkezpenean izan da eta pozik agertu da kanpainarekin. “Eskertzen dugu udalak kanpaina hau abian jartzea, batez ere Hondarribian erostea saritzen delako”. Hortaz gain, bonuen trukaketa martxoan egitea aproposa iruditu zaio lehendakariari, komertzioentzat ez baita hilabete ona izaten.
Funtzionamendua
Deskontu bonuak jasotzeko baldintza zehatz batzuk bete behar direla azaldu dute aurkepenean eta establezimenduak izango dira horiek egitaztatzeko arduradunak, NANaren bidez.
Hortaz gain, bono bat jasotzeko erosketak gutxienez 30 eurokoa izan beharko du, eta pertsona bakoitzak gehienez 10 euroko 3 bonu jaso ahal izango ditu, bonu bat 30 euroko erosketa bakoitzagatik.
Bonuak orain jasoko diren arren, martxora arte gorde beharko dira. Bonuak trukatzeko epea martxoaren 1ean zabalduko da eta 31n itxi. Hiru bonu horiek kanpainara atxikitutako edozein dendetan trukatu ahal izango dira, gutxieneko 20 euroko erosketa bakoitzeko. Hau da, 60 euroko erosketa batean hiru bonuak trukatu ahal izango dira.
