Super Amara Gabonetako Krosa aurkeztu dute
Abenduaren 14an izango da kirol proba. Izen emateak zabalik daude. Helduen lasterketan 350 lasterkari inskribatu dira oraingoz, eta txikienean 300.
Eguberrietako espiritua jasotzen duen krosa bueltan da. Aste honetan aurkeztu dituzte abenduaren 14an gauzatuko diren bi probak: Gabonetako Krosa Txiki eta Gabonetako 5k. Azken honetan 13 urtetik gorakoek parte hartu dezakete.
Lehen proba txikiena izango da. 15:30ean hasi eta ordubeteko iraupena izango du. Proba nagusia 16:45ean hasiko da.
Bost kilometroko proba Irungo kaleetatik korrika gozatzeko prestatuta dagoela zehaztu dute BATeko ordezkariek. “Ibilbidea ideala da marka pertsonalak egin nahi dituztenentzat, eta baita jardunaldi berezi batez gozatu nahi dutenentzat ere”.
Antolatzaileek jakinarazi dutenez helduen lasterketan 560 lasterkari inskribatu dira oraingoz, eta txikienean 340. Hala jarraitu ezkero probaren errekorra hautsi daitekeela uste dute BATeko kideek. Banakako modalitatean parte hartzeko aukeraz gain, kuadrillaka parte hartu daitekeela gogorarazi dute. Iaz 25 kuadrillek parte hartu zuten, eta aurte zifra hori gainditzea espero da.
Bikendi Aizpioleari omenaldia eta Mi dulce guerrero
Aurten ere Bikendi Aizpiolea irundar gazteari omenaldia egingo diote Gabonetako Krosean. Haren omenez oroigarri bat emango zaie haurren kategoriako lehen neska-mutilei.
Bestetik, lasterketa solidarioa izango da eta biltzen den diru guztia Mi dulce guerrero elkarteari bideratuko zaio. Elkarteak 1 motako diabetesa duten haurren bizi kalitatea hobetzeko lan egiten du. Gainera, lasterkari orok ekarpen gehigarri bat egin nahiko balu aukera zabaluko dute lasterketan bertan.
Datu gehigarriak
Izen emateak zabalik dago, eta joan den astean iragarri zuten bezala hilaren 1etik aurrera dortsalaren kostua hiru euro handitu da. Orain, 14 euro balio dute dortsalek.
Horiek ostiralean (hilak 13) Palmera ginean jaso ahal izango dira, 18:00etatik 21:00etara eta hurrengo egunean (larunbatean), 10:00etatik 13:00etara. Bertan hartzerik ez duenak 14:00etatik aurrera irteera ginean jasotzeko aukera izango du.
Aldagelak eta dutxak behar dituenak kiroldegia erabiltzeko aukera izango du, eta irteeratik gertu kontsigna puntu bat ahalbidetuko dute.
15:00etatik aurrera DJ batek Irungo kaleak girotuko ditu, lasterkariei eta inguruko guztiei arratsalde goxo eta dibertigarri bat pasaraziz.
