Saneamendu-sistema ezagutzeko bisita gidatuak
Saneamenduaren Munduko Egunaren harira Bidasoa Behereko saneamendu-sistema ezagutzeko bisita gidatuak antolatu ditu Txingudiko Zerbitzuak-ek. Atalerrekako hondakin uren araztegia eta hondartzako punpaketa-estazioa ezagutzeko aukera izango da.
Saneamenduaren Munduko Eguna dela eta Txingudiko Zerbitzuak-ek Bidasoako saneamendu-sistema gertuagotik ezagutzeko aukera zabaldu du. Horretarako, bi bisita gidatu antolatu dituzte Atalerrekako hondakin-uren araztegira eta hondartzako punpaketa-estaziora. Bisita hauen helburuetako bat sistema eraginkor eta jasangarria edukitzeak duen garrantzia erakustea da.
Bi bisita talde antolatu dira azaroaren 24rako. Lehen taldeak punpaketa-estazioan hasiko du bisita eta hortik Atalerrekako hondakin-uren araztegira joango da. 09:00etatik 12:00ak arte iraungo du. Bigarren taldeak Atalerrekako araztegian bisita motzagoa egingo du, 11:30etan hasi eta 13:30etan bukatuko baitu.
Euskaraz eta gazteleraz eskainiko dira bisitak. Plaza kopurua mugatua da, eta ibilgailuen erabilera ekiditeko doako autobusa hartzen ahalko dute bisitariek. Azaroaren 24ko bisitan parte hartu nahi duenak txinzer.eus webguneko inprimakia bete beharko du.
