Haweia dantza talde palestinarrak emanaldia eskainiko du Hondarribian
Palestinar herriaren identitatea gorde eta zabaltzeko bira bat egiten ari dira Frantziar estatutik. Ondoren, Espainiar estatuan zehar ibiliko dira.
Haweia Dabke dantza talde palestinarra da -Haweiak arabieraz identitatea esan nahi du-, eta hamabost gaztek osatzen dute. Gazte horiek Palestinako Ipar Zisjordanian dagoen Askar errefuxiatu eremuan bizi dira, Nablusen, eta Lilleko eta Nablus Adiskidetasun Elkarteari eta Lilleko Udalari esker Frantzian zehar emanaldiak eskaintzen ari dira. Ondoren, Kataluniako Palestinar Komunitateak bultzatuta, hilaren 25etik abenduaren 8ra Espainiar estatuan barrena ibiliko dira. Hondarribiko Udalaren eta Etxara Hondarribia elkartearen lankidetzari esker Hondarribian ere egingo dute geldialdia. Hilaren 29an Itsas Etxean eskainiko dute emanaldia, arratsaldeko 20:00etan. Segidan, beren bidea jarraituko dute Madrilen eta Andaluzian emanaldiak eskainiz.
Dabkea dantza bat baino gehiago da palestinarrentzat, “Palestinar herriaren erresistentzia, batasun eta ondare kulturalaren sinboloa” da, eta beraz, Palestinar herriaren identitatea gorde eta zabaltzeko helburua du bira honek. Sarrera dohainik da.
Gazaren aldeko zozketa
Etxara Hondarribia elkarteak Gazaren aldeko herri zozketa antolatu du. Txartelak 2 euro balio ditu eta zozketa abenduaren 8an gauzatuko dute. Txartelak Ttoparan, Ipotx gozokidendan, Ondare tabernan, Larran tabernan eta Ondare okindegian eskura daitezke.
Egun horretan honako sariak zozketatuko dituzte: Axalian -ek eskuz diseinatutako poltsa, Done Pedro kontserba sorta, Hontza tabernan 2 cocktail, Gaxen Kafetegian 4 gosari, Garua okindegian 2 gosari, Ondare okindegian 2 gosari, Ttopara kafetegian 2 gosari, Curry Verden 2 gosari eta Balaztak birziklatutako bizikleta bat.
