Familientzako arte tailerrak jasoko ditu Amaia KZk
'Grabatuaren artea Bidasoan' erakusketaren harira, bi arte tailer emango ditu Itsaso Labari arte irakasleak hilaren 9 eta 22an.
Irungo Udaleko Kultura sailak antolatuta eta Grabatuaren artea Bidasoan erakusketaren esparruan, bi arte tailer emango dituzte Amaia KZn. Itsaso Labari arte irakaslea izango da dinamizatzailea, eta saioak hilaren 9an (larunbata) eta 22an (ostirala) izango dira, 17:00etan.
Tailerrak doakoak dira, eta hamasei plaza daude saio bakoitzerako. Ikastaroen hasieran grabatuaren teknikari buruzko sarrera teoriko bat emango du Labarik, eta esperimentu bat egingo dute gero, alderdi teorikoan ikasitakoa praktikara eramateko. Parte hartzaileek matrize bat osatuko dute, eta estanpaziorako erabiliko dute sortutakoa. Zehaztu dutenez tailerra bost urtetik gorako haurrak dituzten familiei zuzenduta dago. Izena emateko aukera egongo da hilaren 22ra arte.
Grabatuaren artea Bidasoan erakusketa Amaia KZn dago ikusgai, eta abenduaren 8ra arte egongo da bertan. Erakusketaren informazio gehiago izateko, joan albiste honetara.
