Irungo Atseginaren erraldoietan inspiratuta, jantzi bilduma bat
Irungo Zebra arropa markarekin kolaboratuko du elkarteak eta Irungo Atseginaren Erraldoi eta Buruhandien Konpartsako erraldoietan oinarritutako jantzi bilduma bat sortuko dute.
Irungo Atsegina elkarteak eta Irungo Zebra arropa markak hitzarmen bat sinatu dute eta Irungo Atseginaren Erraldoi eta Buruhandien Konpartsako erraldoietan oinarritutako jantzi bilduma bat sortuko dute. Asmoa, herritarrei tokiko kulturaren zati enblematiko bat hurbiltzea izan da eta hiriaren ondarearekin eta nortasunarekin konprometituta daudela nabarmendu nahi izan dute.
Horrez gain, jantzi hauen bidez pertsonaiei balioa eman nahi diete, eta hiriko historia eta herritarrek tradizioak irudikatzen dituen ikur bat eramatea lortuko dutela ziur dira. “Ondarea modu ukigarrian eramango dute” gaineratu dute.
Diseinu bakoitza elkarteak berrikusiko ditu, erraldoien irudia “modu egokian” errespetatzen eta baloratzen dela bermatzeko. Eguberrietarako prest egongo dela aurreratu dute, “familia osoarentzako opari paregabea” izango delako.
Tokiko merkataritza eta kulturaren aldeko apustua ere badela azaldu dute, bertako merkataritza eta sormena ere babesten ditu. Hiriko enpresa ehuna bultzatuko dela ere adierazi dute.
