Palestinako genozidioa gelditzeko eskatu dute San Juan plazan eta CAF lantegian
Irun Palestinarekin herri ekimenarekin batu ziren herritarrak eta CAF lantokiko langileak. Horrez gain, Larreaundiko Auzo Elkarteak hitzaldi bat antolatu du hilaren 25erako.
Irunek ere bat egin du Euskal Herri osora hedatu den Palestinarekiko elkartasun olatuarekin eta San Juan plazan elkartu ziren atzo herritarrak. Leire Vargas itzultzaile gernikarraren testua irakurri zen bertan ere eta minutu bateko isilunea egin. Arratsaldean plazan egindako elkarretaratzeaz gain, CAF lantokian lanuztea egin zuten atzo Gernika-Palestina herri ekimenak deituta, Genozidioa stop goiburupean.
Bestalde, Larreaundiko Auzo Elkarteak Irun Palestinarekin herri ekimenarekin elkarlanean, hitzaldi bat antolatu dute auzo elkartean bertan hilaren 25erako eta Susana Mangana arabiar eta islamiar azterlanen irakaslea, hizlaria eta nazioarteko analistarena izango da hitza. Hitzordua 19:00etan finkatu dute eta aurreratu dute hitzaldia gaztelaniaz izango dela. Horrez gain, Palestinari atxikimendua adierazteko zapiak jarriko dituzte salgai 5 euroan.
