Uholdeak saihesteko neurriak eskatu ditu PSE-EEk
Alderdi sozialista "kezkatuta" dago egoerarekin. Horren aurrean, lezoien kota igotzea edo harea zakuen hiru altuera jartzea proposatu du. Hilaren 16tik 18ra oso koefiziente altuko marea biziak espero dira.
Hondarribiko PSE-EEk berriro eskatu dio udalari neurriak har ditzala uholdeak berriro gerta ez daitezen. Horren aurrean, lezoien kota igotzea edo harea zakuen hiru altuera jartzea proposatu dute sozialistek. Udal talde sozialistak gogorarazi du duela urte erdi baino gehiago eskatu zuela egoeraren diagnostiko bat egitea, toki batzuetako etxebizitzak eta ondasunak babesteko neurriak hartu ahal izateko.
Hilaren 16tik 18ra oso koefiziente altuko marea biziak espero direla jakinarazi du herriko PSE-EEk. Koefiziente handi horiek itsasgora eta itsasbehera handiak dakartzatela eta itsas hondoko korronte eta mugimendu handiak sortzen direla adierazi dute.
Alderdi sozialista “kezkatuta” dago azken urteetako uholdeekin. 2023ko abuztukoa eta aurtengo otsailekoa nabarmendu ditu PSE-EEk. Uholde horiek Mendelun izan ziren, itsasadarrak gainezka egin zuelako, eta horrek eragina izan zuen hainbat puntutan. Josu Langilearen urbanizazioan, esaterako, ura 20 zentimetrora iritsi zela nabarmendu dute, atariak eta sarbideak urez betez. Gi-2134 eta N-638 errepideak lotzen dituen bidean dauden baratzeak eta etxebizitzen eremuak ere kaltetuak izan ziren. Ura 40 zentimetrora iritsi zen han.
Gauzak horrela, gobernu taldeak eta gainerako alderdien ordezkariek Mendeluko eremu kaltetuak bisitatu zituzten auzotarrekin. Bisita horren harira, udalak itsasadarraren ertzetan zenbait harea zaku jarri zituela adierazi du PSE-EEk. Aurtengo irailean, baina, marea biziengatik, uholdeak izan dira Zahar Azpi etxearen eta Josu Langilearen bideko zubiaren lezoiaren inguruan. Marea biziek harea zakuak gainditu zituztela jakinarazi du alderdi sozialistak, baratzeak eta Gi-2134 eta N-638 errepideak lotzen dituen bidea urperatuz.
Egoera horren aurrean, Hondarribiko PSE-EEk berriro eskatu dio udalari neurriak hartzeko eta “behingoz” konponbideak bilatzeko udalerrian ohikoa bihurtzen ari den arazo hori konpontzeko.
