Txingudi Errugbiko seniorrak zelaira itzultzeko prest
Denboraldia hasiko dute Zaisa Txingudik eta Biok Txingudik. Emakumeak, Arrasatera joango dira eta gizonezkoek etxean jokatuko dute.
Argazkia: Yaiza Garcia Txingudi Errugbiko bi senior taldeak ligak hastera doaz. Gizonezkoen taldeak Iruña jasoko du larunbatean Plaiaundin eta emakumezkoen taldeak, berriz, Eibarren hasiko du liga igandean.
Lehiarako garaia iritsi zaie Txingudi Rugby Taldeko jokalariei, asteburu honetan aurtengo Euskal ligetan debuta egingo baitute. Larunbatean 16:30etan, etxean jokatuko du Zaisa Txingudik Iruña RCren aurka. Nafarrek bere parte hartzea pasa den asteburuan hasi zuten bonus puntu bat lortuz Uni Bilbo C-ren aurka jasotako porrotan. Laugarren daude sailkapenean.
Ondo ezagutzen dute elkar bi taldeek, izan ere, denboraldiaurrean lagunartekoa jokatu zuten Lekarozen eta, azken boladan, nafarrak izan dira behin eta berriz gailendu direnak. Norgehiagoka hartan ikusitako gabeziak lantzen aritu dira Iñigo Camarero Taus eta Leire Muñoz Cao taldearekin batera eta lan txukuna egiteko prest daudela adierazi dute.
Biok Txingudik, aldiz, igandean hasiko du bere bidea 2024-2025 Euskal ligan, Arrasate/Eibar Bren aurka. Partida Eibarko Unbe zelaian jokatuko da 12:00etatik aurrera. Aurkari gogorra da Debagoieneko taldea, baina Txingudik haien aurka irabaztea zer den badaki. Pasa den denboraldian, bi taldeen arteko bi partidak irabazi zituzten kostaldekoek.
16 eta 18 urtez azpiko taldeek, aldiz, ligako bigarren jardunaldia jokatuko dute. 16 urtez azpiko taldeak Iruñean jokatuko du La Unicaren aurka igandean 11:30etan. Aurreko asteburuan Plaiaundin lortutako garaipenari esker, Txingudi/Baztan hirugarren sailkatzen da ligako B multzoan.
Gabiria Txingudi/AVK Bera Bera/Baztan 18 urtez azpikoak, berriz, ez zuen hain ondo hasi liga etxean Durangoren aurka eta azkeneko postuan kokatzen da. Larunbatean, Getxora joango dira bertako taldearen aurka 16:15etan jokatzeko.
