Rodrigo Cuevas musikari asturiarrak Irunen joko du
Abenduaren 14an izango da emanaldia, Amaia KZn. 'Manual de romeria' diskoaren bira egiten ari da, eta sarrerak dagoeneko salgai daude.
“Irabiatzaile folklorikoa eta artista osoa” bezala definitzen du bere burua Rodrigo Cuevas artista asturiarrak. Manual de romeria da bere azken lana, eta bai musika aldetik bai eta ikus-entzunezkoen aldetik osotasuna lortu du. Bere azken diskoan folklore garaikidea landu du eta Asturiaseko ahots folkloriko garrantzitsuetako batzuk bildu ditu. Produkzio lanetan, Puerto Ricoko Calle 13 artistaren kide izandako Eduardo Cabra aritu da.
Irungo Udalak oraindik iragarri ez badu ere, musika zaleen artean zurrumurrua zabalduta egon da: Rodrigo Cuevasek Irunen joko du. Abenduaren 14an izango da Amaia KZ eta azken urte erdian emango duen Euskal Herriko emanaldi bakarra izanen da. Sarrerak dagoeneko salgai daude, prezio desberdinetan.
Manual de romeria, sinopsia
Erromeria umorez, kritika sozialez, ironiaz, salaketa adimentsuaz eta etxeko sentsualtasun nabarmenez elikatzen da, asturiera eta gaztelania komunikazio-hizkuntza gisa naturaltasunez erabiltzen direlako, eta eszenaratze dotore eta garaikideaz hornitzen da, eszenatokian nahiz jantzietan aurreko iruditeria hautsiz.
Erromeria, beraz, ospakizunerako eta jaunartzerako gunea da, aurreiritzirik gabe sentitzeko lekua, subiranoak eta maitaleak, libertinoak eta onak, on hitzaren zentzurik zabalenean, taupadaka ibiltzeko lekua. Ikuskizun bitxia, beroa, handinahia, alaia, dantzagarria eta baita epikoa ere.
