Hondarribiko EAJk baikor baloratu du Bidasoko osasun akordioa
Osasun Saila eta Irungo eta Hondarribiko Udalak eskualderako etorkizuneko Plan Integralaren oinarriak ezartzeko akordio batera iritsi dira, eta alderdi jeltzaleak akordio horren "oso balorazio positiboa" egin du.
Osasun Saila eta Irungo eta Hondarribiko Udalak Bidasoa eskualderako etorkizuneko Plan Integralaren oinarriak ezartzeko akordio batera iritsi dira, eta Hondarribiko EAJk akordio horren “oso balorazio positiboa” egin du. Alderdi jeltzaleak nabarmendu du, azken urteetan arreta “bakarrik” Irungo anbulatorioan jarri ondoren, Osasun Sailak kontuan hartu dituela “hondarribiarren beharrak” Plan Integrala garatzeko oinarrietan sartzeko. Osasun Sailak “eskualde ikuspegia” bermatu duela adierazi du Hondarribiko EAJk, “etorkizunaren plangintza lantzeko oinarri gisa”.
Alderdi jeltzalea Osasun Sailak bere jarrera aldatu izana leporatu duten “adierazpenen aurka” azaldu da; haien ustez azken asteetan aldatu dena izan baita Irungo Udalak hiriko erdigunean espazio berri bat eskaini duela. Espazio hori teknikariek aztertu behar dutela jakinarazi du herriko EAJk, baina haien ustez “oso aukera ona” da hondarribiarrak artatzeko, batez ere garraio publikoarekin lotura ona dutelako.
Horrez gain, alderdi jeltzaleak balioan jarri du Plan Integrala profesional sanitarioen iritzi, ezagutza eta esperientzian oinarritutako plan funtzional baten eskutik datorrela. Hondarribiko EAJk baietsi du Osasun sailburua duela gutxi bildu zela Bidasoko profesionalekin. Plan Integralaren etorkizuna ikuspegi sanitarioak markatuko duela zehaztu dute, baina profesionalen iritzia kontuan hartuko dute: “Garrantzitsua eta positiboa iruditzen zaigu osasunaren sektoreko profesionalen ahotsek eta iritziek ikuspegi sanitarioa emateko Bidasoa eskualderako plan funtzionalaren diseinuan”.
