'Sagitario A' feria, larunbatean Almudena Grandes plazan
Zientzia fikzio, fantasia eta beldurrezko feria bigarrenez lurreratuko da Irunen, 11:00etatik 14:00etara eta 16:00etatik 21:00etara.
Sagitario A zientzia fikzio, fantasia eta beldurrezko feria bigarrenez lurreratuko da Irunen larunbat honetan (hilak 21). Feriaren gune nagusia Almudena Grandes plazan kokatuko dute, eta 11:00etatik 14:00etara eta 16:00etatik 21:00etara gozatu ahal izango da ondu duten programaz.
Feriaren barruan zientzia fikzio, fantasia eta beldurrezko eleberrien aurkezpenak izango dira. Aurkeztuko diren obrak euskaraz zein gaztelaniaz idatzitakoak izango dira, eta haurrei begirako proposamenak ere topatu ahalko dira. Horrez gain, antolatzaileek adierazi dute komikiek eta rol jokoek garrantzia berezia izango dutela ferian.
Liburu aurkezpenez gain, bestelako jarduerak ere antolatu dituzte publikoak ferian parte hartzeko; hala nola, cosplay mozorroak, mikroipuin kontakizunak, zuzeneko konexioa La Tecla Muerta podcastarekin, solasaldiak autoreekin edota elastikoen zozketak. Feriaren epizentroa Almudena Grandes plazan ezarriko badute ere, goizean hainbat jarduera egingo dira CBA liburutegian, besteak beste, astronomia eskola bat Oscar Ortuñorekin edo Zortzimilla rol jokoaren aurkezpena.
Antolatzaileek nabarmendu dute feriaren zutabeetako bat dela fantasia eta euskal mitologia lotzea; hori dela eta, Ondare Elkarteko erraldoiak eta Oiasso Txaranga festaren parte izango dira. Giro magikoa sortzeko, antolatzaileek publikoa animatu dute feriara mozorrotuta joateko.
