Maria Jesus Berrotaran, lehen emakume mezularia
Sekula ahaztuko ez duen eguna bizitu zuen atzo hondarribiarrak. Banderaren segizioan mezulari gisa aritu zen, lehen emakumea izanik.
Argazkia: Estitxu Ortolaiz. Maria Jesus Berrotaran Etxeberria hondarribiarrak sekula ahaztuko ez duen egun horietako bat bizitu zuen atzo (hilak 15). Jasokunde eta Sagarrondoko Ama Birjinaren Eliza Nagusiko zaindaria omentzeko jaia ospatuko zuten hondarribiarrek, eta urtero lez, udaletxetik Eliza Nagusira eraman zuten bandera. Lupe Queiruga zinegotzia arduratu zuen bandera eramateaz, gainerako zinegotziak alboan zituela. Irailaren 8ra bitarte han izango da.
Berrotaran protagonista nagusietako bat izan zen. Izan ere, mezulari lanak egin zituen estreinakoz, historian lehen emakumea izanik zeregin horretan. Harro bezain pozik babestu zuen banderaren segizioa udaletxetik elizara.
Artzu baserrian jaio zen Berrotaran 1949an. Baserrian eta senarraren familiaren jatetxean aritu ondoren, herriko lehen emakume aguazila izan zen 32 urterekin, estereotipo eta aurreiritzi guztiei aurre egiten, tinko. Gaur egun ere emakume borrokatzailea izaten jarraitzen du Berrotaranek. Emeki elkartearen fundatzaile izan zen eta sustatzaileetako bat izaten jarraitzen du. Emakumeek alardean parte hartzearen aldekoa da, eta urtero, irailaren 8an, harro desfilatzen du Jaizkibel Konpainiarekin.
Lander Gonzalez Salaberriarentzat ere berezia izan zen atzokoa, Berrotaranek bezalaxe, lehen aldiz egin baitzituen mezulari lanak.
Berrotaran, Emekiko kideekin.
Argazkia: Estitxu Ortolaiz.
