VII. Hondarribiko Jai Nagusietako Xake Jaialdian izena emateko aukera, zabalik
Marlaxka klubak jakinarazi du irailaren 14an izango dela lehia, Gipuzkoa plazan. Irailaren 12ra bitarte apunta daitezke herritarrak.
Marlaxka Xake Klubak jaietan urtero antolatutako xake jaialdia. Marlaxka kluba Hondarribiko Jaiei begira jarri da dagoeneko, eta irailaren 14an (larunbata da) egingo duten txapelketaren gaineko xehetasunak zabaldu berri ditu. VII. Hondarribiko Jai Nagusietako Xake Jaialdia jokatuko dute orduan, eta dagoeneko izena eman daitekeela jakinarazi du klubak. Gipuzkoa Plazak jasoko du lehia, 16:15etik aurrera.
10 minutuko finish partida azkarretako jaialdia izango da, bi mailatan banatuta (haurrentzako beste txapelketa paralelo bat antolatuko dute).
16 urte azpikoen kategorian gehienez 70 jokalari onartuko dituzte, eta hiru mailatan banatuko dituzte partaideak, mailaren arabera. Absolutuan berriz, gehienez 30 jokalari onartuko dituzte.
Izena emateko helbide honetara idatzi beharko da, irailaren 12ko 14:00ak arte. Izen-abizenak, jaiotze urtea eta eskola edo herria zehaztu beharko dira.
Bertaratzeko aukerarik ez dutenek zuzenean ikusteko aukera izango dute, lotura honetan.
