Udaltzaingoak eta Ertzaintzak hitzarmena berritu dute
Bi polizien jarduketa ildoak zehaztu dituzte. Segurtasun eta Bizikidetzarako Itunaren parte da akordio hau.
Irungo Udaltzaingoak eta Ertzaintzak lankidetza hitzarmena berritu dute. Hitzarmen espezifiko bat da, eta honen asmo nagusia Udaltzaingoaren eta Ertzaintzaren arteko lankidetza eta elkarlanerako formak eta prozedurak arautzea da. Hitzarmen honetan, jarduketa ildoak zehaztu dituzte, baita ere elkarrekin harremanetan jartzeko eta kooperaziorako mekanismoak ere.
Era horretan, polizia zerbitzuen operagarritasuna hobetu nahi dute, zerbitzuak areagotuz eta herritarren beharrei hobekien erantzuten dion zerbitzu eraginkorrago bat emanda. Lankidetzarako protokolo honekin, herritarrei erakutsi nahi diete euskal poliziak “modu koordinatu, eraginkor eta efizienteago” batean ari dela lanean, “herritarren aldeko lanean”.
Hitzarmena atzo arratsaldean sinatu zuten Juanjo Aizpiolea, Irungo udaltzainburuak eta Luis Claveras Irungo Ertzain etxeko nagusiak. Halaber, atzo bilera egin zuten Cristina Laborda alkateak eta Bingen Zupiria Eusko Jaurlaritzako Segurtasuneko sailburuak.
Lankidetzak 17 urte bete dituela oroitu zuen Zupiriak eta bere fruituak ematen ari dela baieztatu zuen. Hitzarmen berri honi esker, jarduketa poliziaren efikazia “handitu eta egonkortu” egingo dela ziur da sailburua.
Labordaren arabera, hitzarmen honekin poliziaren baliabideak “optimizatuko” dira erantzun “koordinatuak eta eraginkorrak” eman ahal izateko. Gainera, hitzarmenak Segurtasun eta Bizikidetzarako Ituna betetzen duela azaldu du alkateak.
