Dena prest Irungo kaleak festaz betetzeko
Sanmartzialetarako hamazazpi eguneko egitaraua ondu du Irungo Udalak. Gaur, Izarok abestuko du eta, bihar, Camelak.
Irungo jaien egitarauari erreparatuta, gaur hasiko dira Irungo San Pedro eta San Martzial jaiak. Hamazazpi egun iraungo dituzte eta, tartean, gaur eta biharko jarduerak daude. Ekitaldi nagusia gaur gaueko Izaro Andres abeslariaren kontzertua da eta Urdanibia plazan izango da, 22:30ean. Bihar, berriz, Camela talde madrildarrak joko du San Juan plazan 22:30ean ere. Urdanibia plazako txosna gunea gaur irekiko dute ere eta uztailaren 1era arte egongo da zabalik.
Gaur, gainera, jaietarako kartelen lehiaketara aurkeztutako lanen erakusketaren inaugurazioa egingo dute Amaia KZn 18:00etan. Biharko eguna, berriz, kirolarena izango da. Goizeko 08:00etan futbol 7 torneoa egingo da Artiako futbol zelaian, eta, ondoren, 09:00etan, San Martzialeko Squash Saria eta 3×3 Saskibaloiko XXVI. Torneoa egingo dira.
Binakako puzzle txapelketa bihar egingo da ere. Goizean, 11:00etan, 8 eta 16 urte bitarteko haurrentzat izango da, eta arratsaldean, berriz, 17 urtetik gorakoentzat. Hauen txanda 16:30ean izango da. Azkenik, 20:00etan, Kontzertu Omenaldia Irungo Herritarrei egingo da Junkal elizan.
Segurtasuna eta prebentzio neurriak
Azken asteetan udalak segurtasuna bermatzeko zenbait kanpainaren berri eman du. Horietako bat, Jaietan Errespetatu kanpaina da eta bihartik egongo da martxan, jaiak bukatu bitarte. Jaiak disfrutatzeko helburuarekin, “bizikidetzari errespetua” eskatu dute.
Atzo Udaltzaingoak eta Ertzaintzak iragarri zuten elkarlanean arituko direla beste urte batez. Puntu Moreak San Juan plazatik, Gaztegunetik eta Urdanibia plazatik igaroko da. Egutegia kontsultatzeko jaien programazioan topa daiteke.
Segurtasunarekin segituta, IrunBuseko gidariek 14 eguneko greba egingo dute, gaur, bihar eta hilaren 21etik uztailaren 1era. Bitarte horietan gutxieneko zerbitzuak eskainiko dituzte eta horren ondorioz ez da gaueko autobus zerbitzurik egongo.
