Udalak konponbide integralak eskatu ditu trafiko arazoak saihesteko
Cristina Labordak tartean dauden erakundeei bilera bat eskatu die, erakundeen arteko lankidetzarako mahai iraunkor bat martxan jartzea proposatzeko eta gaia bere konplexutasun osoan aztertzeko.
Irungo Udalak “konponbide integralak” eskatu ditu hirian “etengabe” sortzen diren trafiko arazoak saihesteko. Azken auto-ilarak astelehenean eta asteartean sortu ziren nekazaritzaren sektoreko mobilizazioen ondorioz. Egoera horri irtenbidea emateko helburuarekin, Cristina Laborda alkateak tartean dauden erakundeei bilera bat eskatu die, erakundeen arteko lankidetzarako mahai iraunkor bat martxan jartzea proposatzeko eta gaia bere konplexutasun osoan aztertzeko.
Bilkura horietan “protokolo” batzuk ezarri ahal izango direla adierazi du alkateak, “neurri eraginkorrak” abiatzeko eta Irun eta inguruak gerta daitezkeen egoerekin ez kolapsatzeko. “Garaia da Foru Aldundiak, Eusko Jaurlaritzako Trafiko eta Segurtasun Sailak eta Irungo Udalak egoera konpon dezagun, hirirako irtenbide eta protokolo espezifikoak ezarriz, jada ez baita kontua soilik udako irteera eta itzuleretan jardutea. Ikusten ari gara egoera horiek gero eta gehiagotan gertatzen direla”.
Trafiko arazoen afera ez da berria. Irun mugan dagoen hiria da, eta Labordak nabarmendu du kokapen horrek “hiria baldintzatzen” duela errepidez egiten diren joan-etorrietan. Horren aurrean honakoa adierazi du alkateak: “Ez da gauza berria hiriak etengabe jasaten dituen auto-ilaren kontua, eta bertako bizilagunentzat benetako nahasmendua da. Hain zuzen ere, astearte honetan bertan, Behobia eta Katea auzoek zuzen-zuzenean jasan zituzten kilometroetako auto-ilarak, eta horrek galera ekonomiko handiak ekarri dizkie Irungo zenbait enpresari eta ezinegon handia irundarrei, askok jasan behar izan baitzituzten asteartean Gipuzkoako bideetako kilometrotako auto-ilarak. Garaia da egoera konpontzeko eta behin betiko irtenbideak bilatzeko”.
Asteartean auto-ilara mordoa sortu baziren ere, Labordak Udaltzaingoaren jarduna goratu du, hiriguneko zirkulazioa “normaltasun osoz” gauzatu zelako. Hala ere, neurriak eskatu ditu: “Eskertzekoa da gure Udaltzaingoaren eta Ertzaintzaren arteko lana eta lankidetza, zalantzarik gabe Irun barruko eraginak minimizatzea lortu baitzuten. Baina horiek partxeak dira. Ezin gara horrela ibili irteera operazio, mobilizazio edo kontrolatu ezin ditugun gainerako egoera bakoitzarekin”.
