Irunen isuri gutxiko eremua sortuko dutela iragarri du udalak
Prozesuaren lehen fase honetan diagnostiko integrala ari dira egiten. Gero, eremua diseinatu eta behin-behinean onartuko dute.
Cristina Laborda alkateak, Miguel Angel Paez Hirigintzako ordezkariak eta Borja Olazabal Garapen Jasangarriko ordezkariak prentsaurreko batean iragarri dute Irungo Udala isuri gutxiko eremua sortzeko lanetan dabilela, eta une hauetan prozesuaren lehen fasean daudela -Diagnostiko integrala ari dira egiten hiria mugikortasunari, airearen kalitateari eta zaratari dagokionean zein egoeratan dagoen aztertzeko. Era berean, hirian isuri gutxiko eremuaren sorrerak zein eragin izan dezakeen ere aztertu nahi dute-.
Proiektuaren bigarren fasean isuri gutxiko eremua diseinatuko dute aurreko fasean egindako diagnostikoan ateratako ondorioetan oinarrituz, eta, hirugarren eta azken fasean estatu mailako araudiarekin bat etorriz proiektua idatzi eta behin-behinean onartuko dute.
Paezek dio eremu horren sorrerak herritarren osasuna eta bizi kalitatea hobetzen lagunduko duela. Gainera, gehitu du klima aldaketaren ondorio den krisia arintzen lagunduko duela, ohitura osasuntsuagoak eta garraio publikoaren erabilera sustatuko dituela eta biztanleek espazio publikoak berreskuratuko dituztela.
Lankidetzan gakoa
Labordaren esanetan, funtsezkoa da aurrerantzean ere isuri gutxiko eremuari eta hiri barruko Mugikortasun Jasangarrirako Planari bezalako proiektuei lehentasuna ematea, datorren hamarkadan haiek izango direlako hiriko mugikortasunaren oinarria eta Irun hiri atseginagoa izateko euskarriak.
Olazabalek, berriz, lankidetzarako deia egin du: “Udalak eta herritarrek eskutik joan behar dute proiektu honetan. Hori da bide bakarra Irunen isuri gutxiko eremu onena sortzeko”.
