Erdi Aroan murgilduko da Hondarribia
Larunbatean goizeko 10:00etan zabalduko dute Erdi Aroko azoka eta igandean gaueko 21:00etan itxiko dute.
Hondarribia merkataritza gune garrantzitsua izan zen Erdi Aroan. Bertan antolatzen ziren merkatuei esker, merkatari zein artisauen komunitatea oso handia zen. Arotzak, errementariak, upelgileak, urreginak, harginak… denetik zegoen. Iragan hori birgogoratzeko eta gaur eguneko artisau zein merkatariren produktuez gozatzeko, asteburu honetan, Erdi Aroko azoka Hondarribira itzuliko da.
Artisautza eta janarien 80 postu egongo dira eta horiez gain, entretenitzeko antzinako tresnen erakusketa bat, buztina tailerra, Brun burdinola, beira puztua, tradiziozko jokoak, pottokak, arku jaurtiketa eta ipuin kontalariak izango dira besteak beste. Gainera, garai hartan bezala, azokak kristau-kultura, judutarra eta arabiarra bilduko ditu eta saltinbankiek, titiriteroek, malabaristek eta juglareek egun osoan zehar Alde Zaharra girotuko dute.
Larunbatean goizeko 10:00etan zabalduko dute azoka eta igandean gaueko 21:00etan itxiko dute. Ordutegia honakoa izango da: goizez 10:00etatik 14:00etara eta arratsaldez 17:00etatik 21:00etara. Egitarau osoa hemen kontsulta daiteke.
Erdi Aroko azokako argazki lehiaketa martxan da ere. —Oinarriak hurrengo estekan ikus daitezke—. 2024 urteko Erdi Aroko azokan ateratako argazki onenaren bila dabil udala. Ideiarik hartu nahi duenak izango du horretarako aukera. Ekainaren 3tik 16ra iazko lehiaketara aurkeztutako argazkiak ikusgai egongo baitira Arma Plazan.
